Mars tədqiqatlarının zirvəsi hesab edilən və planetdə qədim həyatın izlərinin olub-olmadığını qəti şəkildə sübut etməsi gözlənilən Mars Nümunə Qaytarma (MSR) missiyası bürokratik maneələr səbəbindən ləğv edildi. ABŞ Konqresinin büdcə kəsirləri NASA-nın ən iddialı layihələrindən birinə son qoyub.
Elchi.az xəbər verir ki, missiyanın ləğvində ən böyük amil layihənin böyük dəyəri və texniki mürəkkəbliyi idi. Layihə üçün ilkin olaraq 11 milyard dollarlıq qiymətləndirmələr yeni dizaynlarla 7 milyard dollara endirilsə də, Konqres bu rəqəmləri çox yüksək hesab etdi.
“Persevance” roveri Mars səthindən diqqətlə seçilmiş 33 nümunə borusu toplayaraq missiyasının birinci mərhələsini uğurla başa vurdu.
NASA inanırdı ki, bu boruları Yer kürəsindəki qabaqcıl laboratoriyalarda öyrənmək Marsın yaşayış üçün yararlılığı ilə bağlı sualları tamamilə həll edəcək. Bu boruların taleyi hələ də qeyri-müəyyən olaraq qalır.
NASA-nın qərarından sonra bütün diqqətlər Marsdan nümunə gətirən ilk ölkə olmaq uğrunda yarışda Çinə yönəlib. Çinin də oxşar missiya planı var; lakin bu layihə NASA və Avropa Kosmik Agentliyinin (ESA) birgə səyləri qədər mürəkkəb və elmi cəhətdən yönəlmiş deyil. Çinin planı əsasən “götür və gətir” yanaşmasına əsaslansa da, NASA-nın yaratdığı boşluq Pekin administrasiyası üçün böyük bir fürsət yaradır.
Məryəm
