“Azəriqaz” İstehsalat Birliyi ötən gündən etibarən Nardaran qəsəbəsinə qazın verilişinin bərpası üzrə işlərə başlayıb.

AzVision.az xəbər verir ki, bunu jurnalistlərə açıqlamasında “Azəriqaz”ın rəhbəri Əkbər Hacıyev deyib. Onun sözlərinə görə, dünəndən işçilər evlərdə bir-bir qazı bərpa edirlər:

“Müqavilələr bağlanılır, hər biri razılaşdığı təqdirdə onların qaz təminatını açacağıq. Nardaran qəsəbəsinin əhalisinin “Azəriqaz” İstehsalat Birliyinə borcu var. Keçən il də onlarla böyük problem yaşadıq. Onların müraciəti ilə qəsəbəyə yeni sayğaclar quraşdırdıq. Nardarana əvvəllər bir tərəfdən qaz verilirdisə, indi üç tərəfdən qazla təmin etdik. Qəsəbəyə smart tipli sayğaclar quraşdırırıq. Bu sayğaclarda belə funksiya var ki, hər ödənişdə 30 faiz köhnə borc, 70 faiz yeni borc ödənilir. Sakinlər 1-2 il ərzində köhnə borclarını ödəyə bilərlər”.

O bildirib ki, “Azəriqaz”ın əməkdaşları qəsəbə ərazisinə buraxılmırdı, döyülmə halları var idi: “Əməkdaşların həyatını təhlükə altına sala bilməzdim. Əgər qəsəbə ərazisinə girişimiz təmin edilsə, qaz təchizatı ilə bağlı məsələ tez bir zamanda həll ediləcək. ”.