Namus üstündə törədilən qətl…

Oynayan balacalardan biri su istəyir. Uşaqlardan böyüyü iri su qabının dibindən stəkana su töküb ona, sonra eyni stəkanda digərlərinə verir. Sonra da deyir ki, evdə su yoxdur artıq, tez su gətirmək lazımdır. Altı yaşlı oğlan su gətirməyə razılaşır, ona tapşırırlar ki, ehtiyatlı olsun,  hava istidir, yol da uzaq, yolda ilan, əqrəb ola bilər…

Uşaqların atası içəri girir və evin bir küncünə qoyulan köhnə divanda oturub siqaret yandırır. Uşaqların anası isə iki ilə yaxındır ki, həbsdədir və onlar intizarla analarını, həm də məhbəsdə doğulan kiçik qardaşlarını gözləyirlər…

Bir azdan yaşlı və xəstəhal nənə də gəlib çıxır və balalarının acınacaqlı taleyi barədə kövrələrək danışır. Yaxınlarının danışdığı həyat hekayətində Göygöl rayonunun Murovdağ qəsəbəsində, qaçqınlar şəhərciyində yaşayan Muxtarova Şəhla Qabil qızının başına gələnlər bütün dəhşəti ilə ortaya çıxır.

Həyat hekayətindən məlum olur ki, 2011-ci ilin sonlarında otuz yaşlı Şəhla Muxtarova və həyat yoldaşı otuz beş yaşlı Mübariz Muxtarov dörd uşağı ilə Murovdağda məskunlaşıb. Əslən Kəlbəcər rayonundan olan ailənin dolanışığı ağır olduğundan, ailə çıxış yolunu Yevlax rayonunda imkanlı şəxsin fermasında işləməkdə görür. “Şəhlanın ali təhsili vardı, ibtidai sinif müəlliməsi idi. Ancaq işə düzəldə bilmədim, Kəlbəcər məktəbində məndən işə düzəltmək üçün 5 min manat rüşvət istədilər. Bu səbəbdən fermaya çobanlığa getdik. Bizə ayda iki yüz manat pul və bir kisə un söz vermişdilər, amma dörd ay heç nə vermədilər. Sahibkardan pulumuzu istəyəndə o, ikimizə cəmi 150 manatdan pul verdi. Axırı da belə…” deyə, ailənin başçısı Mübariz Muxtarov dillənir.

Qohumların sözlərindən məlum olur ki, ailə bir ilə yaxın həmin fermada işləyib. Günlərin birində isə həmin olay, ailənin bütün düzənini pozan qətl hadisəsi baş verir.

“Hadisə 2012-ci ilin mayında baş verib, səhər tezdən. Şəhla qoyunların yerləşdiyi tövləyə gedəndə oradakı çobanlardan biri ona söz atır. Adı Ələddin olub, Ələddin Məhərrəmov. O, Şəhlaya təcavüz etmək istəyib, gəlin də özünü müdafiə məqsədi ilə qoyun qırxmaq üçün olan qayçı ilə onu vurub. Həmin qayçı Ələddinin cibində imiş. Sonra Ələddinlə bir yerdə yaşayan  qadın səsə gəlib və qayçını onun bədənindən çıxarıb. Qayçı qabırğanın altında girmişdi, çıxan kimi də qan açılıb və heç xəstəxanaya çatmadan ölüb” deyə, yaxınları bildirirlər.

Xəbər Şəhlanın həyat yoldaşına və digər qohumlarına çatır, onlar özləri polis çağırıb vəziyyəti izah edirlər və Şəhla həbs edilir. Hamı gözləyir və ümid edir ki, qadının özünü qorumaq üçün atdığı addım hakim və qanunlar tərəfindən nəzərə alınacaq. Amma…

Yaxınları deyir ki, iş Yevlax rayon Məhkəməsindən Şəki Ağır Cinayətlər Məhkəməsinə göndərilib: “Şəkidə prokuror Fuad Musayev isə başımıza açmadığı oyun qalmadı. Onun ailədən istədiyi pulu verə bilmədiyimizdən, Şəhlanı həbsdən qurtarmaq mümkün olmadı. O, əvvəlcə bizə söz dedi ki, gedin ölü sahibini razı salın, sonra da mənimlə danışın. Biz də gedib Ələddin Məhərrəmovun qohumlarını axtardıq. Bir qardaşı vardı, ailəsi, övladı yox idi. Məlum oldu ki, o, dörd dəfə həbsdə olub, hətta təcavüz üstündə də  türmədə yatıb. Üst-üstə 25 ildən çox həbsdə olmuşdu.  Bir neçə dəfə evlənib-boşanmış adam idi, sonuncu dəfə 58 yaşlı kişi 24 yaşlı qadınla kəbinsiz yaşayırdı. Biz bir neçə dəfə onun yasında olduq. Sonda onun qardaşı dedi ki, 12 min manat verin, sizdən şikayətçi olmayım. O, qardaşının alçaqlığını bilə-bilə bizdən pul istədi. Sonra ferma müdirinin vasitəçiliyi ilə qiyməti endirmək mümkün oldu və biz ölənin qardaşına 8 min manat pul verdik. Bundan sonra da prokuror özü 20 min manat istədi, bizim pulumuz yox idi, verə bilmədik. Buna görə acığa düşdü”.

Qohumlar danışırlar ki, Yevlax rayon Məhkəməsi Şəhla Muxtarovanı hamilə olduğu üçün zaminə buraxıb. Ancaq Şəkinin prokuroru Fuad Musayev onunla ədavət apararaq həbsinə nail olub: “Fuad Musayevə pul çatmadığı üçün prinsipə düşdü. İnanırsınızmı, o, hakimdən Şəhlaya 14 il 6 ay 7 saat iş istəmişdi. Hakim Elxan Süleymanov isə 8 il iş verdi. Prokurora pul çatmaması necə təsir etmişdisə, iş istəyəndə ən yüksək həddi götürdü. O, hadisənin özünü müdafiə məqsədilə törədildiyini, ilk hadisə olduğunu, qadının dörd uşağının olmasını və hamilə olduğunu və sair yüngülləşdirici səbəblərin heç birini nəzərə almadı. Prosesdə hakimlə prokuror bir-biri ilə dalaşırdı. Onlar elə bilirdilər ki, birinə pul verilib, o birinə yox. Əslində heç birinə pul verə bilməmişdik. 2012-ci ilin dekabrın 25-də ona iş kəsdilər və apardılar türməyə. Üstündən iki gün keçdikdən sonra, ayın 27-də isə  Şəhlanın beşinci uşağı doğuldu”.

Bundan sonra isə Şəki Apelyasiya Məhkəməsi işi 7 ilə endirir: “Bir il işi azaltmağa görə 3 min manat xərcimiz çıxdı”. Hadisə barədə danışan qohumlar prokuror F.Musayevin adını xüsusi vurğulayaraq bildirirlər ki, o, özü və tanış prokurorlar vasitəsi ilə Şəhlanın işində 4-5 dəfə protest verərək işi ağırlaşdırmağa çalışıb.

Bu qətl ailəyə həm də bütün həyatlarının dağılması, durumlarının düzəlməyəcək həddə çatması hesabına başa gəlib. “Türməyə yanına gedəndə oradakılar deyirlər ki, necə adamsınız, gənc qadını buradan çıxarmırsınız? Türmədən çıxarmaq üçün 20 min manat lazım olduğunu bildirirlər. Ailə yeməyə çörək tapmır. Kənddəki dükanların hamısına borcları var. Hadisədən sonra bir neçə ailə mal-qarasını satdı. Şəhlanın əri evini satıb ölənin qardaşına pul çatdırdı. 20 min manata dəyən evi tələm-tələsik 8300 manata satdı”.

Evini satan ailə aylarla çadırda qalıb: “Çadır qurub yaşayırdılar. Yeddi ay bu vəziyyətdə yaşadılar. Sonra qardaşı, qonşular köməklik edib bu boş yerdə bir otaq qaraladılar ki, uşaqlar qışdan çıxa bilsinlər. Xəstələnmişdilər, kiçiyin vəziyyəti lap ağır idi. Həkimə aparmağa da pul yoxdu. Camaat uşaqları yığdı evə.

Ailə borc içindədir. Bir neçə bankdan borc alıblar”.

Ailə başçısı özü də deyir ki, uşaqları evdə tək qoyub işləyə bilmir: “Anam qoca və xəstə adamdır, uşaqlara baxa bilmir. Üstəlik, atam da infarkt keçirib, yataq xəstəsidir. Bu işlə bağlı o qədər borca girmişik ki… Atamın, qardaşımın köməyi ilə kredit ödəyirik. Bu işdə bir neçə nəfər də bizi aldatdı. Qayınanamın qohumu ondan 10 min manat aldı ki, hakimə verəcək ki, işi az istəsin, ancaq etmədi. Sonra pulu da vermədi. Sonra daha üç nəfər aldatdı və 7500 manatımız batdı. Onlardan biri ölüb, digər ikisini də Səbael polisi axtarır. Bu pulların hamısını borc-xərc tapmışdıq. Hazırda külli-miqdarda borc içindəyik. Heç artıq sosial yardım da vermirlər. Ötən il cəmi 127 manat verirdilər. demişdilər ki, bir az çox yazaq, yarı-yarıya hesablayaq. Mən razı olmadım, buna görə az yazdılar. İndi heç onu da vermirlər ki, bankda adına kredit var. Deyirəm, krediti kefimdən götürməmişəm ki”.

Türmədə doğulan Ümid və intihar etmək istəyən ana…

Türmədə doğulan Ümid isə artıq 1 yaş 8 aylıqdır. Ananın da artıq 33 yaşı var. Nənə Ümidin şəkillərinə baxıb kövrəlir. Deyir ki, imkanı olsa, ona da özü baxmaq istəyərdi: “Yazıq uşaq, o da türmə çəkir. Bu, Allaha da xoş getmir”. Yoldaşı isə deyir ki, uşaq 2 aylıq olanda, Şəhla onu ailəsinə vermək istəyib: “Biz götürmədik. O, özünü öldürmək istəyirdi. Heç olmasa, uşaq başını qatır”.

Ailənin Muxtarovanın yanına getmək imkanı da yoxdur: “Hərdən gedirəm. İki aydır ki, heç gedə bilməmişəm. O gün yoldaşım zəng edib deyir ki, uşağın yeməyi yoxdur, dükandan nisyə qatıq almışam, bilmirəm necə edim”. Ailənin aidiyyəti qurumlara yazdığı şikayət məktublarına isə heç bir cavab verilməyib. Uşaqların nənəsi bildirir ki, son ümid yeri kimi dövlət başçısına və xanımına müraciət edəcəklər: “Bizə köməklik etsinlər, bu, namus üstündə törədilən qətldir. Gəlinim günahsızdır, o, özünü qorumaq üçün bu addımı atıb. Öldürülən alçaq birisi idi, bunu onun kəndində hamı təsdiq edir. Xahiş edirəm, balalarımı, nəvələrimi belə çarəsiz vəziyyətdən qurtarsınlar, haqq yerini tapsın”.

Son olaraq qeyd edək ki, bir qrup hüquq müdafiəçisi həmin ailə ilə görüşüb və hadisənin təfərrüatlarını prokurorluq orqanlarına göndərərək işin araşdırılmasına yardımçı olmağa çalışırlar.

Mövzunu diqqətdə saxlayacağıq.