Düz bir aydır ölkəmizdə növbəti dəfə tutatut başlayıb. Amma bu dəfə müxalifətçiləri, gənclər təşkilatlarının üzvlərini, jurnalistləri deyil, MTN generallarını, polkovniklərini, digər nazirliklərin rəhbər şəxslərini qandallayırlar. Bunlar elə həmin şəxslərdir ki, uzun illər xalqa, sahibkarlara, xüsusilə demokratik düşərgəyə, jurnalistlərə qənim kəsilmişdilər. İndi həmin iri ranqlı, yüksək rütbəli məmurlar əndazəni aşdıqlarına, belə desək, cızıqdan çıxdıqlarına, özlərini hakimi-mütləq kimi apardıqlarına, dövləti təhdid etdiklərinə görə həbs olunublar.
Bir sıra məmurlara zamanında “dur” deyilməyəndə həmin vəzifəli şəxsi qandalla, həbslə saxlamaq olur. Düzdür, biz şahidi olmaqdayıq ki, belələrini enində-sonunda damlayırlar. Amma buna qədər o məxluqatlar yüzlərlə insanın evini yıxır, dövlətə ağır zərbələr vururlar.
Odur ki, heç olmasa bu gündən sonra idarəetmə siyasəti dəyişməlidir: ictimai nəzarətin güclənməsinə, mətbuat azadlığına imkan verilməlidir, məmurlardan edilən şikayətlər ciddi araşdırılmalıdır, vəzifə təyinatı meyarları kökündən dəyişməlidir, vəzifəli şəxslərin bizneslə məşğul olması cinayət əməli sayılmalıdır, dərhal işdən azad edilməlidir. Ən əsası, məhkəmələrin tam müstəqilliyinə nail olunmalıdır. Bunlar olmayınca Akif Çovdarovu tutacaqlar, üstündən bir neçə il keçəcək, ortaya növbəti akifçovdarovkimilər çıxacaq. Necə ki, 2005-ci ildə banda başçısı Hacı Məmmədovu tutdular, daha sonra ortaya daha təhlükəli banda – akifkimilər, eldarkimilər çıxdı. Özü daha ciddi təhlükəli mütəşəkkil cinayətkar şəbəkə halında…
Əlbəttə, bu xəmir hələ çox su aparacaq, istintaq müddətində, məhkəmə zamanı, hətta ondan sonralar da tükürpədən faktlar ortaya çıxacaq. Hər kəs bundan şoka düşəcək, bir çoxları isə necə salamat qaldığına görə Allaha şükür edəcək…
Əlbəttə, xalqı çapıb-talayan, dövlətin içində cinayətkar şəbəkə yaradan bu quldurların həbsi hər kəsi sevindirir. Hətta hakimiyyətə münasibətdə ən sərt mövqedə olan adamlar belə ölkə başçısının həyata keçirdiyi bu təmizləmə işlərinə görə ona minnətdarlıq edirlər.
Uzun illər ərzində talançılıq hesabına milyonçu olmuş bu kəslərin tutulmasına sevinməmək mümkünsüzdür. İndi onların topladıqları sərvətləri, mülkləri, biznesləri qeyri-rəsmi və daha sonra müsadirə olunmaq yolu ilə əllərindən alacaqlar, banklarda, seyflərdə saxladıqları nağd pulları isə təcridxana yollarında – “nadzor”lara, müstəntiqlərə, vəkillərə, hüquqi nümayəndələrə xərclənəcək.
Həbsxana qaydalarına bələd olan bir dostumuz deyir ki, müxalifətçilərin, kasıbların həbsi “nadzor”ların, vəkillərin, bəzi müstəntiqlərin ürəyincə deyil. Kasıbın nəyi var ki, yoluğa da verə? Amma generallar, xalqı çapıb-talayıb həbsə düşənlər onların “gözünün işığıdır”. Çünki həmin adamları “qaz kimi” yolmaq olur. Məsələn, heç bir vəkil sidq ürəklə, az pulla belələrini müdafiə etməz, gərək vəkilə azı 20 min ödəsinlər ki, bunların işinə çıxmağa razı olsunlar…
Həmçinin, heç şübhəsiz ki, bir vaxtlar Akifi görəndə rəngi qaçan “nadzor”lar təcridxanada onu gəzinti zamanı açıq havada 10 dəqiqə artıq saxlamaq üçün “hesab” alacaqlar. Və əcəb edəcəklər. Bu adamlar çoxlarına qan uddurublar. Sahibkarların başına torba keçirib zirzəmidə ac-susuz, havasız saxlayanda bu günü düşünmürdülərsə, indi real olaraq yaşasınlar, görsünlər əzab nədir. Qoy hava almaq üçün “qussunlar”.
Müstəntiq də istintaqın sonunda işə qanunun imkan verdiyi “yüngülləşdirici halları” əlavə etmək üçün güman ki, bu talançıların taladıqlarından bir az “yüngülləşdirəcək”.
Daha sonra həmin generallar, digər vəzifəlilər “zona” gedəcək, komediya ondan sonra başlayacaq… Beləcə, onlar qaşıq-qaşıq yığdıqlarını çömçə ilə paylayacaqlar. Onlardan alınanlar isə halal sayılır, “oğrudan oğruya halaldır” prinsipi hələ də işlək vəziyyətdədir…
Necə deyərlər, hayla gələn, küylə gedər…
Adam gərək özünü itirməyə, özünü itirdisə, adamlıqdan çıxdısa, İlahi ədalət mütləq öz yerini tutacaq…
Son şərhlər