” “Şaftalı” sözünü belə düz yaza bilməyən müəllimlər var… Var. Ancaq, müqəddəs hesab etdiyimiz peşə sahiblərinin şərəf və ləyaqətini bu dərəcədə aşağılamaq və kütləvi şəkildə ictimailəşdirmək, heç də yaranmış vəziyyətdən uğurlu çıxış yolu sayıla bilməz…”.
Elchi.az xəbər verir ki, bu fikirləri təhsil üzrə ekspert Nadir İsrafilov bu gün Elm və təhsi naziri Emin Əmrullayevin Bakı şəhəri təhsil işçilərinin sentyabr konfransında çıxışı ilə bağlı Feysbuk hesabında qeyd edib.
Ekspert bildirib: “Bir də ki, nədənsə düşmüşük yalnız elə müəllimlərin üstünə, müəllim hazırlığı ilə məşğul olanlardan və belələrini işə qəbul edənlərdən heç bir kəlmə də olsun deyən yoxdur…”.
Qeyd edək ki, bu gün Emin Əmrullayev Bakı şəhəri təhsil işçilərinin sentyabr konfransında çıxış edib. Nazirin sözlərinə görə, 25-29 yaşı olan müəllimlər təhsilverənlərin sertifikasiya imtahanlarında 100 faiz uğur qazanıb: “40-55 yaş arası olanlar nazirliyi daha çox narahat edir”.
E.Əmrullayev qeyd edib ki, şaftalı sözünü düz yaza bilməyən müəllimlər də var: “60 yaş üzəri olanlardan 68%-i uğur əldə edib. Müəllimlər daha çox sözlərdən hərflərin ardıcıllığı ilə bağlı 18 faiz səhv cavab verib. Bəzi müəllimlər şaftalını “şafdalı” kimi yazır”.
Yeganə