Sergey Lavrov: “Onlar məğlubiyyətə uğradılana qədər hava hücumlarımızı dayandırmayacağıq. Ölkədə atəşkəsin qorunmasının yolu isə Suriya-Türkiyə sərhədinin bağlanmasından keçir”
Omanda çıxış edən Rusiyanın xarici işlər naziri Sergey Lavrov, Suriyadakı hava hücumlarını sona çatdırmaq üçün hələlik bir səbəblərinin olmadığını deyib. Sputnik-in məlumatına görə, Cenevrədə Suriya ilə bağlı keçirdiyi görüşlərdə müxalifətin lazımsız ilkin şərtlər irəli sürdüyünü bildirən Lavrov, ölkədə atəşkəsin qorunmasının yolunun Suriya-Türkiyə sərhədinin bağlanmasından keçdiyini deyib.
Omanda jurnalistlərin sualarını cavablandırarkən Rusiya XİN başçısı deyib: “Əl-Qaidənin törəməsi olan Əl-Nusra Cəbhəsi kimi terror təşkilatları həqiqi mənada məğlubiyyətə uğradılana qədər hava hücumlarımızı dayandırmayacağıq. Bu səbəbdən də, hava hücumlarının başa çatması üçün hələlik bir səbəb görmürəm”.
Lavrov həmçinin deyib ki, Suriyada İŞİD-lə bağlı konkret mübarizə aparmaq üçün burada hava əməliyyatlarını həyata keçirən ABŞ-ın liderlik etdiyi koalisiya ilə Rusiya və müharibə bölgəsindəki qüvvələr arasında gündəlik əlaqə yaratmaq zəruridir. O, koalisiyanın əməliyyatlarının Rusiyanın hava hücumlarına başlamasından sonra daha təsirli olmağa başladığını da əlavə edib.
“Biz əməliyyatlarımızla il yarım ərzində, elə də təsirli olmayan ABŞ-ın rəhbərlik etdiyi koalisiyaya nümunə olduq. Rusiyanın əməliyyatlarının uğurlarından sonra koalisiyanın əməliyyatları da çox təsirli olmağa başladı”, —Lavrov deyib.
Rusiya xarici siyasət idarəsinin rəhbəri brifinqdə İsveçrənin Cenevrə şəhərində davam edən Suriya müzakirələrini də dəyərləndirib: “Müzakirələr zamanı Cenevrədəki Suriya muxalifəti arasında kaprizli insanların olduğu ortaya çıxdı. Onlar Cenevrə Qətnaməsi, Vyanada qəbul edilən sənədlər və BMT-nin Təhlükəsizlik Şurasının qərarı ilə heç bir əlaqəsi olmayan ilkin şərtlər irəli sürüblər. Mən bəzi Suriya müxalifət qüvvələrinin müzakirələr barədə ultimatum verməsini dar düşüncəlilik kimi qiymətləndirirəm”.
“Düşünürəm ki, ər-Riyad müzakirələri nəticəsində təşkil olunan müxalifət qüvvələrinin bəziləri Kürd PYD partiyasının müzakirələrə qatılmasına əngəl olan Türkiyə kimi sponsorları tərəfindən bir xeyli şişirdilib”, —XİN başçısı vurğulayıb.
Lavrov Suriyada atəşkəsin tənzimlənməsi üçün Türkiyə-Suriya sərhədində qaçaqmalçılıq fəaliyyətinin dayandırılmasının lazım gəldiyini söyləyib.
Sərhədin bağlanmasını “atəşkəs üçün açar şərt” kimi ifadə edən Lavrov, “Türkiyə-Suriya sərhədindəki qaçaqmalçılıq fəaliyyətləri yaraqlıların bəslənməsini təmin edir. Bu səbəbdən də, sərhəd bağlanmadıqca, həqiqi bir atəşkəsin təmin edilməsini gözləmək çətindir” deyib.Rusiyalı nazir neft bazarındakı vəziyyətə də toxunub: “Müzakirə barədə qərar veriləcəksə, Rusiya Neft İxrac Edən Ölkələr Təşkilatı (OPEC) daxilindəki əsas hasilatçılarla müzakirələrə hazırdır. Bazarda nələrin baş verdiyini anlamağı çox vacib hesab edirik. Bazara təsir edən bir çox faktorlar var. Neftin qiymətlərinə nəzarət etmək üçün istifadə olunan köhnə mexanizmlər işə yarayacaq kimi görünmür. Düşünürəm ki, hamımız bu məsələdə həmfikirik”.
Son şərhlər