Obamanın dəvəti iqtidarda arxayınlıq yaradacaq?
ABŞ prezidenti Barak Obamanın Azərbaycan prezidenti İlham Əliyevi aprel ayında Vaşinqtonda keçiriləcək 4-cü Nüvə Təhlükəsizliyi Sammitinə dəvət etməsi hadisəsinin Azərbaycan hakimiyyətini bir qədər arxayınlaşdıracağı və siyasi məhbus adlandırılan şəxslərlə bağlı müsbət qərar verilməsini tormozlaya biləcəyi barədə iddialar irəli sürülməyə başlayıb.
“Turan” informasiya agentliyinin rəhbəri Mehman Əliyev isə bu iddiaların əsaslı olmadığı qənaətindədir. Onun fikrincə, əksinə, Obamanın dəvəti islahatlar məsələsində müsbət rol oynaya bilər: “Amerikanı narahat edən məqamlarla bağlı iş aparılır. Barak Obama ilə birinci görüş Antalyada G-20 sammitində keçirildi. Növbəti görüş isə Vaşinqtonda nəzərdə tutulub. Hər halda, Vaşinqton səfəri reallaşanadək Azərbaycan hakimiyyəti bir sıra addımlar atacaq. Azərbaycan tərəfinin dəvət xəbərini bir ay sonra ictimaiyyətə elan eləməsi göstərir ki, hakimiyyət dəvəti qəbul etmək qərarına gəlib və Vaşinqton səfərinədək iki tərəfi narahat eləyən məsələləri yoluna qoymaq istiqamətində çalışacaq. Ona görə də yaxın zamanlarda operativ iqtisadi idarəetmə sisteminə keçid və başqa islahatların aparılması gözlənilir.
Nazirlər Kabinetinin son toplantısında dövlət başçısının çıxışında da bunun anonsu verilmiş oldu. Yaxın zamanlarda Nazirlər Kabinetində və hakimiyyətdə ciddi dəyişikliklər baş verə bilər. Paralel olaraq gözləmək lazımdır ki, siyasi istiqamətdə də addımlar atılacaq. Çünki bu məsələlər bir-biri ilə bağlıdır”.
Meman Əliyevin sözlərinə görə, gözləniləndir ki, ölkə başçısı bir sıra iqtisadi və siyasi islahatlar keçirərək, siyasi məhbuslarla bağlı qərarlar verərək Vaşinqtona gedəcək: “Siyasi məhbusların azadlığa buraxılması məsələsində müəyyən addımların atılmasının bu yaxınlarda Avropa Birliyinin xarici siyasət komissiyasının rəhbərinin gəlişinə qədər də baş verməsini gözləyirəm”.
Son şərhlər