Rusiya Təhlükəsizlik Şurasının sədr müavini Dmitri Medvedev iddia etdi ki, ABŞ prezidenti Donald Tramp Qrenlandiyanı almaq üçün kifayət qədər tez hərəkət etməsə, Qrenlandiya referendumla Rusiyaya qoşulmaq qərarına gələ bilər.
Elchi.az xəbər verir ki, sosial media hesabında verdiyi açıqlamada Medvedev ABŞ-ın Qrenlandiya ilə bağlı təşəbbüslərini qiymətləndirdi.
ABŞ-ın Qrenlandiyanı almasının “dünya iqlimini” dəyişdirmək üçün yaxşı ola biləcəyini bildirən Medvedev qeyd etdi:
“Amma Tramp tələsməlidir. Təsdiqlənməmiş məlumata görə, bir neçə gün ərzində qəfil referendum keçirilə bilər və Qrenlandiyanın bütün 55.000 sakini Rusiyaya birləşmək üçün səs verə bilər. O zaman hər şey bitərdi.”
Tramp Qrenlandiya ilə bağlı suallara cavab olaraq bildirmişdi: “Əgər biz Qrenlandiyanı almasaq, Rusiya və ya Çin alacaq. Mən prezident olduğum müddətcə bu baş verməyəcək. Hərbi mövcudluq kifayət deyil. Mülkiyyətə sahib olmaq lazımdır.”
Tramp, Qrenlandiyanın ətrafında Çin və Rusiya sualtı qayıqlarının və digər hərbi gəmilərin mövcudluğunu qeyd edərək, buna icazə verməyəcəklərini və “Qrenlandiyanı bu və ya digər şəkildə alacaqlarını” bildirdi. Qrenlandiyanı ələ keçirmək istəklərinin NATO birliyinə mənfi təsir edib-etməyəcəyi soruşulduqda, Tramp “Onların bizə ehtiyacı bizim onlara ehtiyacımızdan daha çoxdur” cavabını verdi.
Danimarkanın muxtar bölgəsi olan Qrenlandiya əvvəllər ABŞ-ın suverenliyin təhvil verilməsini əhatə edən təkliflərini rədd etmişdi.
Şayəstə
