Ekspertlər yenidən milli valyutanın durumuna diqqət çəkirlər, çünki…
Milli valyuta olan manat yenidən cüzi olaraq ucuzlaşmaqdadır. Ekspertlər yenidən manatın dəyərdən düşməsi ehtimallarına diqqət çəkiblər. Bildirilir ki, FES-in uçot dərəcəsini artırmaması dolların bahalaşmasının qarşısını müvəqqəti alsa da, təhlükə sovuşmayıb. Üstəlik, FES-in iyul ayında da toplantısı gözlənilir.
Ekspertlər qeyd ediblər ki, bir il ərzində manatın kəskin ucuzlaşması təhlükəsi qalmaqdadır. “Formula 1″ yarışları ilə bağlı ölkəyə gələn xarici valyuta isə manatla bağlı proseslərə təsir etmək gücündə deyil, çünki turistlər az, xərclənən valyuta da yetərli deyil.
Ekspert Əkrəm Həsənov musavat.com-a bildirib ki, manat yaydan normal şəkildə, dəyər itirmədən çıxa bilər: “Dolların ucuzlaşması ehtimalı yoxdur. Dollar 1,60 manata qədər gedib çıxa bilər. Bunu gözləmək lazımdır. Çünki ABŞ-ın Federal Ehtiyat Sistemi uçot dərəcəsini hələlik qaldırmadı. Amma prinsipcə, əvvəl-axır bu il ərzində qaldıracaq. Ona görə də yaxın aylarda dolların dünyada ciddi şəkildə bahalaşması gözlənilmir. Azərbaycanda dollar-manat nisbəti yalnız FES-in faizinə bağlı deyil. Həmçinin, Azərbaycana gələn dollarla bağlıdır. Azərbaycana gələn dollar ehtiyatı azalır. Amma yay ərzində elə böyük sürətlə azalmayacaq. Buna görə indi devalvasiya gözləmək lazım deyil. İyun, iyul, avqust aylarında devalvasiya gözlənilmir. Amma cüzi ucuzlaşma gözlənilir. Uzunmüddətli perspektivdə isə istənilən halda ucuzlaşma labüddür. Bir il ərzində dolların kəskin bahalaşması ehtimalı çox böyükdür”.
Ekspert Natiq Cəfərli isə qeyd edib ki, manatın taleyi həmişə iki əsas amildən asılı olur: “Manat dünya bazarında neftin qiymətindən və dolların dünya bazarında indeksinin səviyyəsindən asılı olur. Qonşu ölkələrdə milli valyutaların dollara qarşı ucuzlaşması istər-istəməz Azərbaycana da təsir göstərir. Son zamanlar görünən odur ki, FES-in gələcəkdə alacağı qərarlara hazırlıq məqsədilə qonşu ölkələrdə milli valyutaların dəyərdən düşməsi prosesi yenidən sürətlənib. Neft bazarında da qeyri-müəyyənlik qalmaqdadır. Ekspertlərin dediyinə görə, bu ilin ortalama qiyməti 45 dollar ətrafında olacaq. Bu amilləri nəzərə alaraq düşünürəm ki, manata qarşı təzyiqlər də getdikcə artacaq. Bir müddət sonra Azərbaycanda Mərkəzi Bank məcburən manatın getdikcə yumşalmasını həyata keçirməyə başlayacaq. Yay aylarına təsadüf etməsi mümkündür, amma kəskin artımların olacağını gözləmirəm. Bununla belə, manatın dəyərdən düşməsini izləyəcəyik. FES növbəti dəfə faizi qaldırana qədər bu, davam edəcək. Əgər bu, baş verəcəksə, təbii ki, yay aylarında manatın vəziyyəti yenidən acınacaqlı olacaq. Üstəlik, neftin qiymətləri də düşməyə başlasa, bu, manata olan təzyiqləri artıracaq”.
Son şərhlər