Azərbaycanın fövqəladə hallar naziri, general-polkovnik Kəmaləddin Heydərov Füzuli rayonunun Horadiz şəhərində vətəndaşları qəbul edib.
APA-nın Qarabağ bürosunun xəbərinə görə, Muğam Mərkəzində keçirilən görüşdə nazir Füzuli, Ağcabədi, Beyləqan və Xocavənd rayonlarının sakinlərinin, habelə həmin rayonlarda məskunlaşmış məcburi köçkünlərin müraciətlərini dinləyib.
21 nəfər şəxsən nazir Kəmaləddin Heydərov tərəfindən qəbul olunub. Bundan başqa, kadr məsələləri ilə bağlı 116, digər məsələlərlə əlaqədar müraciət etmiş 147 vətəndaş nazir müavinləri, nazirliyin müvafiq baş idarə və qurum rəhbərləri tərəfindən qəbul edilib.
Qəbulda Fövqəladə Hallar Nazirliyinin səlahiyyətlərinə aid olmayan müraciətlər aidiyyəti qurumlara çatdırılmaq üçün qeydiyyata alınıb və bununla əlaqədar vətəndaşlara ətraflı məlumat verilib.
