Kremlin sözçüsü Dmitriy Peskov Rusiya ilə ABŞ arasında silahlara nəzarətlə bağlı konkret danışıqların olmadığını bildirib: “Bu sahədə beynəlxalq hüquqi bazanın son qalıqları da yox olmaq üzrədir”,-deyib.
Elchi.az xəbər verir ki, Paytaxt Moskvada jurnalistlərə açıqlama verən Peskov, ABŞ-da bəzi senatorların ABŞ-ın Rusiya ilə imzaladığı “Yeni START” silahlara nəzarət müqaviləsindən çıxmaq üçün yeni qanun layihəsinin hazırlanmasını dəyərləndirib.
Silahlara nəzarət məsələsinin təkcə Rusiya və ABŞ üçün deyil, bütün dünya üçün son dərəcə əhəmiyyətli olduğunu vurğulayan Peskov, “Təəssüflə qeyd edirik ki, hazırda Moskva ilə Vaşinqton arasında ciddi və konkret təmaslar yoxdur”,-ifadəsini işlədib.
ABŞ və Rusiya arasında silahlara nəzarətlə bağlı təmasların vaxtının azaldığına diqqət çəkən Peskov, “Bu sahədə beynəlxalq hüquqi çərçivənin son qalıqları da yoxa çıxır. Zaman daralır, ona görə də vəziyyət acınacaqlıdır. Bunun üçün tam məsuliyyət Vaşinqtonun üzərinə düşür”,-deyib.
Nuranə Məmmədova