Manatın devalivasiyasından sonra dolların kursunun qalxması ən çox bank sistemində problemlərə yol açdı. Banklardan dollarla kredit götürən vətəndaşlar öz borclarını ödəyə bilmədilər. Bu isə öz növbəsində həm bankları, həm də vətəndaşları çıxılmaz vəziyyətə saldı. Bu səbəbdən də redaksiyamıza mütəmadi olaraq şikayət ünvanlayan vətəndaşlar problemlərinin hüquqi yollarla həllini öyrənməyə çalışırlar. İslamınSəsi olaraq redaksiyamıza daxil olan bütün şikayətləri oxuyaraq, vətəndaşların suallarına ekspertlər vasitəsi ilə cavab tapmağa çalışırıq. Növbəti şikayət məktubunda 1 ildir həyat yoldaşını itirən, 2 övladı fiziki qüsurlu olan məcburi köçkünün problemləri öz əksini tapıb. Vətəndaş bildirir ki, həyat yoldaşı 3 nəfər zamin vasitəsi ilə bankdan dollarla kredit götürüb. Lakin ailə başçısı 1 il öncə vəfat edib və qadın banka olan borcu min bir əziyyətlə ödəməyə davam edib. İkinci devalivasiyadan sonra dolların kursunun manata nisbətdə qalxması 14 min dollar borcu 24 minə çatdırıb. İndi adına heç bir mülk olmayan vətəndaş kredit borcunu ödəyə bilmir və hüquqi yollarla probleminin necə həll edilə biləcəyini öyrənmək istəyir.
İslamınSəsi olaraq vəkil Vamiq Şükürovla əlaqə saxlayıb vətəndaşın probleminə aydınlıq gətirməyə çalışdıq. Vəkil bildirdi ki, əgər vətəndaş bankdan kredit götürərkən tərəflər arasında sığorta müqaviləsi bağlanıbsa, o zaman məbləğ sığorta tərəfindən ödənilir. Əksər hallarda tərəflər arsında sığorta müqavilələri bağlanır. Lakin sığorta müqaviləsi imzalanmayıbsa, o zaman qadın vəfat etmiş həyat yoldaşının kredit borcunu ödəməyə bilər. Əgər dünyasını dəyişən şəxsdən onun ailəsinə, övladlarına heç bir mülk qalmayıbsa, bu halda bank pulun ödənməsi ilə bağlı heç bir tələb irəli sürə bilməz. Bank məhkəməyə müraciət edərsə, o zaman kredit borcunun ödənilməsi zaminlərin üzərinə düşəcək. Ailə başçısını itirən qadın və onun övladları üçün bu halda heç bir problem yaranmayacaq.
Son şərhlər