“Məcburi köçkünlər və onlara bərabər tutulan şəxslər üçün vahid aylıq müavinətin müəyyən edilməsi haqqında” Fərmanına dəyişiklik edilməsi barədə Prezident İlham Əliyev Sərəncamı ölkə başçısının məcburi köçkünlərin problemlərinin həllinə diqqət və qayğısının növbəti təzahürüdür.

AzTV xəbər verir ki, bunu Qaçqın və Məcburi Köçkünlərin İşləri üzrə Dövlət Komitəsinin sədri Əli Həsənov deyib. Onun sözlərinə görə, Fərmanın 1.2-ci hissəsinin 1-1.-ci bəndinə əsasən, fərdi qaydada sayğacların quraşdırılması texniki baxımdan mümkün olmayan yerlərdə həm elektrik enerjisinə, həm qaza, həm də suya görə ödəniş 2017-ci ilin 1 yanvarından Qaçqın və məcburi köçkünlərin işləri üzrə Dövlət Komitəsi tərəfindən əvvəlki qaydada və əvvəlki limitə uyğun olaraq ödəniləcək. Baş nazirin müavini əlavə edib ki, söhbət yataqxanalardan, pansionatlardan, yarımçıq tikililərdən gedir.

Qeyd olunub ki, Fərmanın növbəti bəndi qaz olmayan yerlərdə məskunlaşan məcburi köçkünlərə aiddir. Belə ki, Nazirlər Kabineti 3 gün ərzində limitləri müəyyənləşdirəcək və 15 gün ərzində qazlaşdırma proqramını və Azərbaycan prezidentinin aktlarını bu fərmana uyğunlaşdırılması ilə bağlı təkliflərini hazırlayıb razılaşdrımaq üçün dövlət başçısına təqdim edəcək:

“Elektrik enerjisinə görə limit müəyyənləşəcək və bu limit “Qaçqınkom” tərəfindən mərkəzləşmiş qaydada “Azərişığ”a ödəniləcək. Su, qaz isə yenə əvvəlki qaydalara uyğun mərkəzləşmiş qaydada ödəniləcək. Bu zaman elektrik enerjisinə görə limit dəyişəcək, çünki bu burada qaz yoxdur, tam sərfiyyat olur. bu işi başa çatdırmaq üçün “Qaçqınkom”, yerli icra hakimiyyətləri, işğal altındakı icra hakimiyyətləri və kommunal xidmət təşkilatları ciddi işləməlidir”.

Komitə sədrinin sözlərinə görə, dəyişikliyə əsasən komitə həmin kontigentin siyahısını, məskunlaşma yerlərini müəyyənləşdirərək icraya başlayacaq. Əli Həsənov vurğulayııb ki, bu qəbildən olan insanların kompakt yaşadıqları obyektlərin sayı, ünvanı, adı, orda yaşayan əhalinin ümumi sayı var, amma əvvəlki qaydada 20 manat ödəmək üçün çox qısa müddətdə müvafiq qurumlar komitəyə adlı siyahı təqdim etməlidir: “Heç kimdə belə bir fikir formalaşmasın ki, nə üçün 20 gündən sonra fərmanda dəyişiklik oldu. Bu dəyişikliyin olacağı bilinirdi, dekabr ayında ölkə başçısı tərəfindən tapşırıq verilmişdi ki, xüsusən qaz olmayan yerlərdə yanvar ayında monitorinq aparılsın. Biz bu monitorinqi apardıq, sərfiyyat müəyyənləşdi. Biz artıq bilirik, bir adam və bütün ailə kommunal xidmətlərə görə nə qədər sərfiyyat edib. Prezident bunların hamısını yoxlayandan sonra yenidən məcburi köçkünlərə doğru bir addım atdı”.

Qeyd olunub ki, məcburi köçkünlərdə fərmana dair hansısa sual yaranarsa, onlar Komitənin 4312907, 4315159, 4300922, 5308237, 4300923 telefonlarına zəng edə bilərlər.