“”İstiqlal”çı Abbasova yerini göstərməyin vaxtı çatıb”

Abbas Abbasovun Moskvada azərbaycanlıları aşağılamaqdan çəkinməyərək onları bazar alverçisi kimi təqdim etməsi Azərbaycanda haqlı olaraq hiddətlə qarşılanıb.

Xatırladaq ki,vaxtilə bir sıra tanınmış şəxslər, o cümlədən Eldar Sabiroğlu da Abbas Abbasova tutduğu mövqeyə görə sərt reaksiya vermişdi. Son günlər Abbas Abbasobun xalqımızı aşağılayan və geniş müzakirəyə səbəb olan məsuliyyətsiz bəyanatı da sabiq millət vəkili tərəfindən hiddətlə qarşılanıb.

Bu barədə Moderator.az-a danışan Eldar Sabiroğlunun fikirlərini diqqətinizə çatdırırıq:

“Onun barəsində öz fikrimi əvvəllər bildirmişəm. Abbas Abbasovun fəaliyyəti tamamilə Azərbaycanın əleyhinə yönəlib. O, Rusiyada yaşayan azərbaycanlıları birləşdirmək əvəzinə, öz şəxsi maraqlarına və mərkəzdən aldığı təlimatlara əsasən, millətimizi parçalamaq yolunu tutdu. Unutmayaq ki, “parçala və hökm sür” şüarı Moskvanın siyasətində hələ də pas atmayıb, əksinə, daha itilənmiş yırtıcı forma alıb. Mən Rusiya ilə Azərbaycanın kəllə-kəlləyə gəlməsinin tərəfdarı deyiləm, iqtidarımızın da bu istiqamətdə apardığı siyasətin doğru olduğu qənaətindəyəm. Ancaq A.Abbasovu ruhlandıran amilləri də diqqətdən kənarda qoymaq olmaz. “İstiqlal”çı Abbasova yerini göstərməyin vaxtı çatıb. Moskva onu xüsusi qoruyur. Ola bilsin səhv edirəm, lakin siyasi hadisələrin gedişi onu göstərir ki, ənənəsinə sadiq qalan Kreml həmyerlimizi heç də öz qoynunda təsadüfi saxlamır. Moskva belə bir xoş münasibəti vaxtilə Vəzirova və Mütəllibova da göstərib. Ümimiyyətlə, Rusiya heç vaxt Azərbaycana münasibətdə səmimi olmayıb, bundan sonra da ondan səmimi münasibət gözləmək sadəlövhlükdür. Torpaqlarımızı işğal edib ermənilərə təhvil verən və düşmənimizi bugünədək müasir silahlarla silahlandıran Rusiya deyilmi? Qafqazlarda bu siyasət 250 ildir ki, Rusiya tərəfindən heç bir hədd və çərçivə gözləmədən həyata keçirilir…

Azərbaycanda bütün iqtidarlarla dil tapan Abbasov “İstiqlal” ordenilə təqaüdə göndərilsə də, böyük həvəslə Rusiyanı özünə Vətən seçdiyini bəyan edir. İndi bu “istiqlalçı” Moskvada oturub Azərbaycanın əleyhinə iş aparmaqla məşquldur. Təsəvvür edin, Moskvaya bağlılığı onun düşüncə və milli hissiyyatına artıq nə dərəcədə üstün gəlib ki, xalqımızı açıqdan-açığa təhqir edir, onu bazar alverçisi kimi göstərir. Hətta bir az da irəli gedərək bu alverin qandan gəldiyini söyləyir. Bu qədərdən sonra ona güzəştə getməkmi olar?

Əkrəm Əylislidən onun nə əskikliyi var? Biri roman yazaraq xalqımızı aşağıladı, biri də ermənipərəst saytda millətimizi yerdən-yerə vurdu. Erməni də bizi bazar alverçisi kimi təqdim edir, Abbas Abbasov da. O  zaman onun düşmənlə heç bir fərqi yoxdur. Allah bilir hələ bizim bilmədiyimiz və səsi qapalı kabinetlərdə qalan gizli görüşlərdə nələr danışır. Adama ən dəhşətli gələn odur ki, milli birliyimizə zərbə vuran bu adamın Azərbaycanın özündə də, az da olsa, tərəfdarı var. Mən bunu öz şəxsimdə hiss etdim. Vaxtilə Abbas Abbasovu tənqid etdiyimə görə bəzi adamlar heç bir həya-abır gözləmədən bildirdilər ki, sənin nəyinə lazımdır, özləri bilər! Bax, dəhşət burasıdır və buna təəssüf edirəm. Əkrəm Əylisli xalq yazıçısı adından məhrum edildiyi kimi, bu adamın da əlindən “İstiqlal” ordenini almaq lazımdır…”