İsrail qüvvələri işğal altındakı İordan çayının qərb sahilinin müxtəlif bölgələrində keçirdiyi reydlər zamanı 26 fələstinlini nəzarətə götürüb.
Elchi.az xəbər verir ki, Fələstinli Məhbuslar Dərnəyi və Fələstin Azadlıq Təşkilatına bağlı Fələstin Əsirlər İşləri Komitəsi tərəfindən birgə yazılı açıqlama verilib.
Açıqlamaya görə, İsrail qüvvələri dünəndən etibarən İordan çayının qərb sahilində 26 fələstinlini nəzarətə götürüb.
Qəzzaya hücumların başladığı 7 oktyabrdan bu yana İordan çayının qərb sahilində və Şərqi Qüdsdə məhbusların ümumi sayı “evlərində və ya hərbi keçid məntəqələrində saxlanılanlar, təzyiq altında təslim olmaq məcburiyyətində qalanlar və nəzarətə alınanlar da daxil olmaqla 5780 nəfərə çatıb.”
Sözügedən iki qurumun illik hesabatına görə, 2023-cü ilin dekabr ayının sonuna qədər İsraildə həbsxana və təcridxanalardakı fələstinlilərin sayı 80-dən çoxu qadın olmaqla təxminən 8800-ə yüksəlib.
2023-cü il oktyabrın 7-də İsrail qüvvələrinin Qəzzaya hücuma başladığı gündən bəri işğal altındakı İordan çayının qərb sahili və Şərqi Qüdsdə fələstinlilərə qarşı həbslər, basqınlar və hücumlarda artım müşahidə olunur.
Oktyabrın 7-dən bəri işğal altındakı İordan çayının qərb sahili və Şərqi Qüdsdə İsrail qüvvələrinin və qeyri-qanuni yəhudi məskunlaşanların hücumları nəticəsində 341 fələstinli həyatını itirib.
Şayəstə Hüseynova
Son şərhlər