İsrail Azərbaycanda keçiriləcək müdafiə sərgisinə 16 şirkətlə qatılacaq

Şirkətlər sərgidə İsrail Müdafiə Nazirliyinin Beynəlxalq Müdafiə Əməkdaşlığı Agentliyinin rəhbərliyi altında təmsil olunacaq

 İsrail müdafiə sənayesi sentyabr ayında Bakıda keçiriləcək ADEX-2014 müdafiə sərgisində İsrail Müdafiə Nazirliyinin Beynəlxalq Müdafiə Əməkdaşlığı Agentliyinin (SİBAT) rəhbərliyi altında 16 şirkətlə qatılacaq.

 APA-nın sərginin təşkilatçısı olan «İteca Caspian» şirkətinə istinadən verdiyi məlumata görə, sərgidə İsraili SİBAT və dünyanın böyük müdafiə şirkətləri olan «Elbit Systems», IMI, İAİ, IWI, «Rafael»-lə yanaşı, müdafiə sənayesində tanınmış «Aeronautics», «Visionmap», «ATL-Atlantic Technologies», «Camero-Tech», DSIT, «Fibrotex Tech», «İspra LTD», «Plasan», «Meprolight», «Ness Technologies» şirkətləri də təmsil edəcək.

 APA-nın əldə etdiyi məlumata görə, İsrail şirkətləri tərəfindən ADEX-2014 sərgisində müxtəlif silah və aviasiya sistemləri, pilotsuz uçuş aparatları, hava hücumundan müdafiə vasitələri, proqramlaşdırma, maskalanma vasitələri, nəqliyyat vasitələri, elektro-optik sistemlər, mühafizə vasitələri, dəniz silah və sonar sistemləri, müxtəlif sensorlar Azərbaycanın hərbi qurumlarına təqdim ediləcək.

 Rəşad Süleymanov – APA