ABŞ Prezidenti Donald Tramp Venesuelaya quru qoşunları göndərməyi düşünüb-düşünməməsi ilə bağlı suala “Mən bu ehtimalı istisna etmirəm. Mən heç bir ehtimalı istisna etmirəm” cavabını verdi.
Elchi.az xəbər verir ki, ABŞ Prezidenti Donald Tramp Ağ Evdə keçirilən tədbirdə cari hadisələrlə bağlı açıqlamalar verdi. Venesuela ilə gərginliyə toxunan Tramp, Venesuelaya quru qoşunları göndərməyi düşünüb-düşünməməsi ilə bağlı suala “Mən bu ehtimalı istisna etmirəm. Mən heç bir ehtimalı istisna etmirəm” cavabını verdi. Venesuelaya diqqət yetirməyin vacibliyini vurğulayan Tramp dedi: “Onlar həbsxanalardan ölkəmizə yüz minlərlə insanı buraxdılar. Bunu buradakı bu gənc xanımdan (Daxili Təhlükəsizlik Katibi Kristi Noem) daha yaxşı heç kim bilmir.”
“Onların bu ölkəyə etdikləri heç vaxt unudula bilməz”
Venesuelanın ABŞ-a çoxsaylı qanunsuz immiqrant göndərdiyini, onların çoxunun həbsdə olan cinayətkarlar olduğunu iddia edən Tramp dedi: “Mən Venesuelanı idarə edən insanları sevmirəm. Mən xalqı sevirəm, amma onların bu ölkəyə etdikləri, Co Bayden və Demokratların bu ölkəyə etdikləri heç vaxt unudula bilməz”. Venesuela prezidenti Nikolas Maduro ilə görüşməyə hazır olub-olmayacağı soruşulduqda, Tramp “Bəli, yəqin ki, onunla danışardım. Bəli, çünki hamı ilə danışmışam” cavabını verdi.
“Maduro ilə danışacağam”
“Maduronun onunla potensial görüşdə sizin dəstəyinizlə vəzifədə qala biləcəyini hiss etdirəcək bir şey deməsi və ya etməsi mümkündürmü? Qəbul edilə biləcək hər hansı bir açıqlama varmı?” sualına Tramp “Bunu demək çətindir, çünki bu, mürəkkəb bir sualdır. Sualı qəsdən çətinləşdirmək istəmirəm. Lakin Maduro ölkəmizə əvvəlcə narkotiklərlə, sonra isə digər ölkələrlə münasibətlərlə böyük zərər vurub” cavabını verdi. Maduro dövründə Venesuelanın ABŞ-a digər ölkələrdən daha çox zərər verdiyini iddia edən Tramp “Məhbusların azad edilməsi məsələsi də daxil olmaqla. (Maduro) ABŞ-a qarşı yaxşı davranmayıb. Görəcəyik nə olacaq. Müəyyən bir müddət ərzində onunla danışacağam” cavabını verdi.
Tramp narkotiklərlə mübarizədə qətiyyət mesajı göndərdi
Tramp həmçinin narkotiklərlə mübarizə aparmaq üçün Meksikaya hərbi personalın göndərilib-göndərilməyəcəyi ilə bağlı suala da cavab verdi. O, bunun onun üçün heç bir problem olmayacağını bildirdi və narkotiklərlə mübarizədə lazım olan hər şeyi edəcəklərini vurğuladı. Meksikadakı ciddi narkotik problemlərinə baxmayaraq, son zamanlar həmin ölkədən ABŞ-a narkotik axınının qarşısını aldıqlarını vurğulayan Tramp dedi: “Həftəsonu Mexiko şəhərində böyük problemlərimiz oldu. Su yollarında gördüyümüz tədbirlər sayəsində oradan bizə demək olar ki, heç bir narkotik daxil olmur. Məgər bu nisbət təxminən 85, bəlkə də 50 faiz azalmayıb? Dəqiq uğur nisbətini bilmirəm. Bu, əla əlamət hesab edilə bilər.”
“Kartellərin yerini bilirik”
Narkotika gəmilərinə hücum edərək minlərlə insanın həyatını xilas etdiklərini vurğulayan Tramp dedi: “Kartellərin hər birini tanıyırıq; hamısı ciddi nəzarət altındadır. Heç kim cənub sərhədinə girmir, amma onların ora necə çatdıqlarını dəqiq bilirik.”
Şayəstə
