Biz prezident Serj Sarkisyanın istefası tələbindən geri çəkilməmişik.

Bu sözləri İrəvanda polis bölməsini ələ keçirən silahlı qrupun başçılarından biri Varujan Avetisyan lragir.am saytına müsahibəsində deyib. O bildirib ki, onların tələblərindən biri Jirayr Sefilyanın azad edilməsi və onunla danışıqların başlanması olub: “Mahiyyətcə, bu danışıqlar artıq başlayıb və məsələni üçüncü yolla həlli məsələsi müzakirə edilir”.

Girovların hamısının azad edilib-edilməməsi məsələsinə gəldikdə isə V.Avetisyan bildirib ki, bunun nə vaxt mümkün olacağını demək çətindir: “Mənə elə gəlir ki, çətinliklər var, buna görə də bunun bu gün olub-olmayacağını deyə bilmərəm”.

Onun sözlərinə görə, silahlı qrup tələblərindən geri çəkilməyib: “Biz fikirlərimizdən imtina etməmişik və Serj Sarkisyanın istefası tələbindən imtina etmirik. Sadəcə hazırda Jirayr Sefilyan məsələni sarsıntısız həll etməyi təklif edib”.

Qeyd edək ki, İrəvanda polis bölməsini ələ keçirən və 6 polisi girov götürən silahlı qrup bu gün səhər bir nəfəri azad edib. Ermənistanın Milli təhlükəsizlik Xidməti bəyanat yayaraq silahlıları təslim olmağa çağırıb, lakin vəziyyətdə hələ ki dəyişiklik baş verməyib. (Azərtac)