İndoneziyanın mərkəzi hissəsində yerləşən Sulavesi adasında dünən baş verən 6,7 gücündə zəlzələ nəticəsində 1 nəfər həyatını itirib, 38 nəfər isə yaralanıb.
Elchi.az xəbər verir ki, İndoneziyanın Sulavesi adasında yerləşən Mərkəzi Sulavesi vilayətinin paytaxtı Palu şəhərində dünən qeydə alınan 6,7 ballıq zəlzələ can itkisinə səbəb olub. İndoneziya Meteorologiya, Klimatologiya və Geofizika Qurumundan (BMKG) verilən açıqlamada Sigi bölgəsində 1 nəfərin öldüyü, 38 nəfərin isə xəsarət aldığı bildirilib. Palu, Sigi və Poso şəhərlərini birləşdirən yola, 6 ibadətgaha, 2 körpüyə, 2 ofis binasına və 67 evə ziyan dəydiyi qeyd edilib.
Xatırladaq ki, 2018-ci ildə Sulavesidə baş verən 7,5 ballıq zəlzələdə 4 mindən çox insan həyatını itirmişdi. 2021-ci ilin yanvarında isə Sulavesi adasının Mamucu şəhəri yaxınlığında baş verən 6,2 gücündə zəlzələdə ən azı 100 nəfər dünyasını dəyişmişdi.
Məryəm
