“Azərbaycan güclü idman dövlətidir”.
Elchi.az xəbər verir ki, bunu Azərbaycan Prezidenti, Milli Olimpiya Komitəsinin prezidenti İlham Əliyev dekabrın 18-də Milli Olimpiya Komitəsində 2017-ci ilin idman yekunlarına həsr olunan mərasimdə deyib.
Dövlət başçısı qeyd edib ki, il ərzində Azərbaycan idmançıları xalqımızı böyük qələbələrlə sevindiriblər: “Ölkəmizdə idman sürətlə inkişaf edib. Bu il Azərbaycan idmançıları beynəlxlaq yarışlarda 851 medal qazanıb ki, onlardan 347-si qızıl olub”.
Ötən illə müqayisədə medalların sayının daha çox olduğunu diqqətə çatdıran Prezident İlham Əliyev bildirib ki, bu Azərbaycanda idmanın inkişafının dinamik xarakter aldığını göstərir. 2017-ci ilin bir çox idman qələbələri ilə yadda qaldığını deyən dövlət başçısı bu il ölkə şahmatçılarının üçüncü dəfə Avropa çempionu adına layiq görüldüyünü, iki idmançının boks və sərbəst güləş üzrə üçqat dünya çempionu olduqlarını, Azərbaycanın idman məktəbinin yetirməsi olan Ramil Quliyevin isə ilk dəfə olaraq yüngül altetika üzrə dünya çempionu titulunu qazandığını söyləyib.
Komanda idman yarışlarında da ölkə idmançılarının çox yaxşı nəticələr göstərdiklərini deyən dövlət başçısı qeyd edib ki, Bakıda voleybol üzrə qadınlar arasında Avropa çempionatında Azərbaycan qızları dördüncü yerə layiq görülüb. “Qarabağ” futbol komandası tarixdə ilk dəfə olaraq Çempionlar Liqasının final mərhələsində iştirak edib: “Bir neçə ildən sonra Bakı Olimpia Stadionu futbol üzrə bir neçə mötəbər yarışa ev sahibliyi edəcək”.
“Əminəm ki, bundan sonra da idmançılarımız bizi qələbələrlə sevindirəcək”- deyən dövlət başçısı vurğulayıb ki, paytaxt Bakıda və bölgələrdə idman infrastukturu yaradılıb. Prezident bildirib ki, bu günə qədər regionlarda 43 Olimpia İdman Mərkəzləri açılıb, bundan sonra da bu istiqamətdə işlər davam etdiriləcək.
Son şərhlər