Artıq siyasi danışıqlar öz gücünü itirib. Danışıqların hər hansı nəticə verəcəyini gözləməyə dəyməz. Serj Sərkisyan və onun komandası hakimiyyətdə olduğu müddətdə müharibə qaçılmaz olacaq.

Bu sözləri Axar.az-a Ermənistan və Azərbaycan xarici işlər nazirlərinin Nyu Yorkda keçiriləcək bugünkü görüşünü şərh edən politoloq Tofiq Abbasov deyib. O bildirib ki, bu görüşdən problemin həllinə dair hər hansı gözləntilərə ümid etməyə dəyməz:

“İlkin olaraq, Ermənistan Prezidenti Serj Sərkisyanın son günlər səsləndirdiyi fikirlər, Azərbaycana dair açıq-aydın hiss edilən aqressiya onu göstərir ki, Ermənistan ümumiyyətlə sülh danışıqları ilə bağlı müzakirələrə hazır deyil. Nyu Yorkda Baş Aassembleyada çıxışı zamanı Sərkisyan son dərəcə qərəzli ifadələr səsləndirib, yalan faktlarla Azərbaycanı günahlandırmağa çalışdı. Hazırda Ermənistan rəhbərliyinin məsələnin həlli ilə bağlı heç bir gedişi, məramı və niyyəti yoxdur. Təsadüfi deyil ki, Azərbaycan Prezidenti İlham Əliyev Sərkisyanın bu sözlərinə sərt və qəti cavab verdi, əsaslı dəlillər gətirərək onun iddialarının əsassız olduğunu dünya ölkələrinin liderlərinin diqqəıtinə çatdırdı. İlham Əliyev Ermənistanı ciddi şəkildə xəbərdar edərək, torpaqların güc yoluyla qaytarıla biləcəyini də istisna etmədi. Bu, açıq-aydın göstərir ki, Ermənistanla danışıqlar yolu ilə dil tapmaq artıq mümkünsüz hal alıb. Ona görə də çox güman ki, bu, texniki görüş olacaq”.

Politoloq qeyd edib ki, Ermənistanın səsləndirdiyi fikirlər bir-birini təkzib edir:

“Bir tərəfdən Ermənistanın Xarici İşlər naziri Edvard Nalbəndyan ərazilərin müəyyən hissəsinin Azərbaycana qaytarılması ilə bağlı açıqlamalar edir, digər tərəfdən Ermənistan Silahlı Qüvvələrinin Baş Qərargah rəisi Movses Akopyan təhlükəsizliyin təmin olunması üçün işğal edilmiş bütün rayonların əldə saxlanmasının vacib olduğunu deyir. Erməni tərəfinin hər dəfə bir-birini təkzib edən fikirlər səsləndirməsi problemin sülh yolu ilə həllinin hələ ki, mümkün olmadığını göstərir. Ona görə də Prezident İlham Əliyev təkcə işğalçı dövlət və onun rəhbərliyini deyil, eləcə də həmsədrləri və dünya birliyinin rəhbərlərini Ermənistanın Azərbaycanın ərazi bütövlüyünü pozaraq, həm də dünya nizamına zərbə endirdiyi ilə bağlı xəbərdar etdi. Prezidentin bu xəbərdarlıqlarını ciddi bir siqnal kimi qəbul etməliyik. Çünki prezidentin bu çıxışı Azərbaycan dövlətinin yanaşmasının təməlini təşkil edir”.

Qeyd edək ki, Ermənistan və Azərbaycan xarici işlər nazirləri sabah Nyu Yorkda görüşəcəklər.