O, yüksək qan təzyiqindən və kəskin ürək ağrılarından əziyyət çəkir
Əbülfəz Sadıqbəyli: ” Müayinə və müalicə olunmasa, Siracın həyatına olan təhlükə daha da ciddiləşəcək”
Hazırda həbsdə olan Müsavat başqanının müavini Fərəc Kərimli və onun qardaşı Sirac Kərimlinin Hüquqlarını Müdafiə Komitəsinin sədri Əbülfəz Sadıqbəyli təcridxanada qardaşlarla görüşüb. Başqan müavininin səhhəti normal olsa da, Sirac Kərimlinin sağlamlığında ciddi problemlər var.
Bu barədə musavat.com-a Əbülfəz Sadıqbəylinin özü məlumat verib: “Dünən Fərəc və Sirac Kərimli qardaşları ilə görüşdüm. Hər ikisi yaxşı əhval-ruhiyyədədir. Fərəcin saxlanma şəraiti və səhhətindən şikayəti yoxdur. Amma Siracda ciddi problemlər var. Saxlanma şəraiti normal olsa da, onun təzyiqi çox yüksəkdir. Dərmanlarda təsir etmir. Təzyiqi ən aşağı düşəndə 160 olur. Əksər hallarda 180-200 olur. Vəkil Nemət Kərimli bu barədə Penitensiar Xidmətə müraciət edib. Ona görə də iki gün öncə Siracı tibb məntəqəsinə aparıblar. Müayinədən sona heç bir problemin olmadığını deyiblər. Halbuki Siracın kəskin ürək ağrıları var. Sol tərəfdən qolu keyiyir. Ağrı belinə vurur. Nəfəs çatışmazlığı var. Verdikləri dərmanın təsiri olmur. Müayinə və müalicə olunmasa, Siracın həyatına olan təhlükə daha da ciddiləşəcək”.
Qeyd edək ki, Fərəc Kərimli iyulun 23-də həbs edilib. Onun həbsindən bir həftə əvvəl qardaşı Sirac Kərimli həbs edilib. Hər iki qardaşa qarşı Cinayət Məcəlləsinin 234.4.3 maddələri ilə (kütləvi şəkildə narkotik maddələr əldə etmə, saxlama və satma) cinayət işi açılıb.
Oktyabrda müddətləri başa çatan qardaşların həbs müddəti daha 3 ay uzadılıb. Onlara qarşı irəli sürülən maddə üzrə qardaşları 7 ildən 12 ilə qədər azadlıqdan məhrumetmə cəzası gözləyir.
Son şərhlər