Sabiq milli təhlükəsizlik naziri Eldar Mahmudovun 1-ci müavini, general-leytenant Hilal Əsədovun evində axtarış aparılması barədə məlumatlar yayıldı.
Məlumata görə, H.Əsədovun Bakının mərkəzindəki mənzilinə 10-a yaxın şəxs gəlib. 28 May küçəsi, ev 18 ünvanında aparılan axtarışdan sonra H.Əsədov həmin şəxslərin əhatəsində naməlum istiqamətə aparılıb. Axtarış zamanı mənzildən sənədlər götürülüb.
Hafta.az bu məlumatı araşdırmaq üçün həmin ünvanla əlaqə saxladı. Ətrafda heç bir qeyri–adi hadisə baş vermirdi. Qonşu xanım isə əməkdaşımızla söhbətində bildirib ki, səhər saatlarında Hilal Əsədovu şəxsən görüb:
“Hilal müəllimi səhər gördüm, hətta salamlaşdıq da. Yanında həmişə olan cangüdənləri var idi. Bu uşaqları da biz illərdir görüb tanıyırıq. Elə onlarla birlikdə maşınına minib getdi. Bütün gün evdə olmuşam. Qonşumuza kimlərinsə gəldiyini görmədim. 10 nəfər gəlib burada axtarış aparsaydı, mütləq xəbərimiz olardı”.
Bu qonşunun bizə dedikləridir. H.Əsədovun hazırda harada olduğunu dəqiq söyləmək mümkün deyil. Prokurorluq orqanlarından sabiq nazir müavinin evində axtarış aparılması ilə bağlı məlumatı dəqiqləşdirmək istədik. Cavab bu oldu ki, hazırda bu məsələ ilə bağlı rəsmi məlumat hazırlanır və mətbuata göndəriləcək. Yəni xəbər nə təsdiq, nə də ki təkzib edildi. Hadisələri izləyirik. H.Əsədovun yaxınlığında yaşayanlarla da əlaqələrimizi davam etdirəcəyik. Yeni məlumatlar barədə növbəti yazımızda sizə xəbər verəcəyik.
Qeyd edək ki, oktyabrın 17-də Baş Prokurorluğun və Baş Dövlət Xüsusi Mühafizə İdarəsinin əməkdaşları MTN-də xüsusi əməliyyat keçirib. Həmin gün prezident İlham Əliyevin sərəncamı ilə Eldar Mahmudov milli təhlükəsizlik naziri vəzifəsindən uzaqlaşdırılıb. “MTN işi” ilə bağlı Baş Prokurorluqda Cinayət Məcəlləsinin 302-ci (əməliyyat-axtarış fəaliyyəti haqqında qanunvericiliyi pozma), 308-ci (vəzifə səlahiyyətlərindən sui-istifadə) və 309-cu (vəzifə səlahiyyətlərini aşma) maddələri ilə cinayət işi başlanıb.
Son şərhlər