“Tbilisi Vaşinqtonla strateji tərəfdaşlığını bərpa etməyə hazırdır və ABŞ administrasiyasının qərarını gözləyir”.
Elchi.az xəbər verir ki, bu fikirləri Gürcüstanın baş naziri İrakli Kobaxidze jurnalistlərə açıqlamasında bildirib.
“Siz Gürcüstan-Amerika münasibətlərinin kontekstindən xəbərdarsınız. Bu kontekst çox çətindir, onu ABŞ-ın keçmiş prezidenti Co Baydenin administrasiyası yaratdı. Baxacağıq, səbirlə gözləyirik. Biz açıq şəkildə bəyan etmişik ki, ABŞ ilə strateji tərəfdaşlığı sıfırdan və aydın bir yol ilə bərpa etməyə hazırıq. Biz ABŞ administrasiyasının qərarını gözləyirik”, – Kobaxidze bildirib.
Gürcüstanın ABŞ-la münasibətləri 2024-cü ildə ölkənin Xarici Agentlər Qanununu qəbul etməsindən sonra xeyli pisləşib. Ötən il noyabrın 28-də Kobaxidzenin Aİ-yə üzvlük danışıqlarının açılması prosesinin dondurulduğunu bəyan etməsindən sonra ABŞ Dövlət Departamenti respublika ilə strateji tərəfdaşlığı dayandırıb. Hələ Donald Trampın prezident seçilməsindən əvvəl Gürcüstan hakimiyyəti dəfələrlə ABŞ-da hakimiyyət dəyişikliyinə və Vaşinqtonla münasibətlərin yenidən qurulmasına ümid bəslədiklərini bəyan edib.
Yeganə
