Gün işığı immun sisteminin infeksiyalara qarşı mübarizəsini gücləndirir - Araşdırma

Oklend Universitetinin alimləri gün işığının immun sisteminin infeksiyalara qarşı mübarizə qabiliyyətini artıra biləcəyini müəyyən ediblər. Elchi.az xəbər verir ki, “Science Immunology” jurnalında dərc edilən bir araşdırma, neytrofillər adlanan əsas immun hüceyrələrin gündüz saatlarında bakteriyaları öldürməkdə daha aktiv olduğunu müəyyən edib. Neytrofillər insan bədənində ən çox sayda ağ qan hüceyrələridir. Onlar ilk olaraq iltihab yerinə gəlir və patogenləri məhv edirlər. Təcrübə zamanı alimlər genomu bir çox cəhətdən insan genomuna bənzəyən şəffaf zebra balığının modelindən istifadə ediblər. Balığın bədəninin şəffaflığı real vaxt rejimində immun hüceyrələrinin davranışını müşahidə etməyə imkan verib. Məlum oldu ki, neytrofillərin gündüz-gecə dövrü ilə sinxronlaşdırılan öz sirkadiyalı saatı var. Məhz işığın təsiri altında bu saatlar hüceyrələrin antibakterial funksiyalarını gücləndirən daxili mexanizmləri işə salır. Gün işığı şəraitində neytrofillər iltihaba daha tez cavab verir və bakteriyaları öldürməkdə daha təsirli olur. Müəlliflərin fikrincə, kəşf immun hüceyrələrin sirkadiyalı ritmlərini tənzimləməyə yönəlmiş yeni dərmanların yaradılması üçün əsas ola bilər. Bu, iltihablı və yoluxucu xəstəliklərdə immun cavabın effektivliyini artıracaqdır. Tədqiqatçılar indi işığın immun sistemi hüceyrələrinin fəaliyyətinə təsir edən dəqiq molekulyar mexanizmləri öyrənməyə yönəlib. Nuranə Məmmədova