Əgər 7 iyun seçkilərində qarşımızda Ərdoğandan asılı, icraçı bir Baş nazir obrazı var idisə, 1 noyabr seçkilərindən sonra fərqli bir Davudoğlu ilə qarşılaşdıq.
Əgər 7 iyun seçkilərini AKP sədri olaraq Davudoğlu Ərdoğanın başqanlıq sistemi arzusuna görə itirmişdisə, 1 noyabr seçkilərini yalnız öz nüfuzu, bacarığı hesabına qazandı. Belə ki, Davudoğlu 5 ay ərzində həm müxalifəti zərərsizləşdirdi, həm də itirilmiş nüfuzlarını bərpa etdi, HDP-yə gedən “əmanət səsləri” geri qaytardı.
Əgər Davudoğlu 7 iyunda 40.9 faiz səs qazanmışdısa, 5 aylıq fəaliyyəti nəticəsində bunu 49.39-a yüksəldə bildi. Bununla da Ərdoğanın kölgəsi kimi adlandırılmaqdan özünü xilas etmiş oldu.
Üstəlik, bu müddətdə fürsətdən istifadə edib MHP daxilində də ikitirəlik yaratdı, oradan qopara bildiyi Toğrul Türkeşi yeni hökumətdə özünə köməkçi təyin etdi.
Şübhəsiz ki, Davudoğlu əsas məsələlərdə Ərdoğanla məsləhətləşir, vahid sistemin parçası olduğunu unutmur. Amma baş nazirin prezidentin mütləq hakimiyyətlilik iddiasına qarşı olduğu da deyilir. AKP-ni koalisiya hökuməti qurmaqdan, müəyyən məhkəmə proseslərinin başlamasından xilas edən Davudoğlunun artıq bu saatdan sonra özünü tamamilə Ərdoğanın əmrinə müntəzir duruma gətirdiyini düşünmək olmaz. Çünki Ərdoğan indiyə qədər xalq arasında mübahisəsiz üstünlüyə sahib idisə, aşırı iddiaları səbəbindən reytinqi müəyyən qədər aşağı düşüb.
İndi isə seçkilərdən az bir müddət sonra Rusiya qırıcısının vurulması ilə yenidən gündəmə gələn Davudoğlu bu dəfə daha fərqli xarizması ilə qarşımızdadır. Rusiya qırıcısının birbaşa onun əmri ilə vurulduğunu deyən Davudoğlu hazırda Putinin xarizmasını məhv edən yeganə lider kimi dünya mətbuatının manşetlərində yer alıb. Üstəlik, Qərbin də bu məsələdə dolayısı ilə Davudoğluna dəstək verməsi ona əlavə dividend qazandırır.
Çünki Davudoğlunun əlində önəmli rıçaqlar var. Avropanın qəbul etməyə qorxduğu iki milyondan çox qaçqın və bunlara xərclənən milyardlarla pul.
Türkiyə Suriyadakı qaçqınlara sahib çıxmaqla bölgədə demokratik rejimin qurulmasını həqiqətən istəyən yeganə dövlət olduğunu göstərdi. Çünki Suriya və İŞİD-in faktiki nəzarət etdiyi ərazilər onunla sərhəddədir.
Türkiyə isə Suriya məsələsi ilə qazandığı bu üstünlükdən Avropa Birliyinə üzv olmaq şansını qazanmaq düşüncəsindədir. Türkiyə hökumətinin Qərblə apardığı son görüşmələr də məhz buna hədəflənib.
Belə görünür ki, Ərdoğanın yarıda saxladığı bu prosesi Davudoğlu tamamlayacaq.