Azərbaycan döyüş və müdafiə qabiliyyətini artırır; yeni növ silahların serial istehsalına hazırlaşan Bakıdan İrəvana barıt qoxulu daha bir xəbərdarlıq
Ötən həftə Bakıya edilən çoxsaylı və yüksək səviyyəli rəsmi səfərlər Azərbaycanın bölgədəki yerinin nə dərəcədə önəmli olduğunu növbəti dəfə göstərdi. Eyni zamanda, ölkəmizin bir çox dövlətlərdən ötrü nə qədər arzulanan olduğunu ortaya qoydu. Bu isə Azərbaycana öz köklü maraqlarını təmin etməkdə yeni və unikal fürsətlər açır.
Söhbət, əlbəttə ki, ən əvvəl üçüncü on illikdir ədalətli həllini tapmayan Dağlıq Qarabağ problemindən gedir. Aydındır ki, bu problemin nizamlanmasında ölkəmizin hərbi qüdrətinin artırılması həlledici əhəmiyyətə malikdir və olacaq. Analitiklərə görə, İsrail baş naziri Benyamin Netanyahunun keçən həftə Bakıya reallaşan səfəri bu xüsusda çox vacibdir və öz nəticələrini tezliklə göstərə biləcək.
***
Azərbaycanın hərbi sənaye naziri Yavər Camalovun İsrail baş nazirinin səfərindən az sonra – Müdafiə Sənayesi Nazirliyinin yaradılmasının 11-ci ildönümü ilə bağlı keçirilən tədbirdə verdiyi açıqlamalar bu yöndə qənaət və ümidləri gücləndirir. Həmin açıqlamalar arasında işğalçı Ermənistanın qorxulu röyası sayılan silahlarla bağlı mühüm məqamlar da var.
Məsələn, nazir bildirib ki, Azərbaycan elektromaqnit impulslu silahlar istehsal edəcək. Onun sözlərinə görə, belə silahların istehsalı istiqamətində danışıqlar başlayıb və yaxın illərdə istehsalı nəzərdə tutulub: “Bu silahlar 2 km məsafədə düşmənin radio-elektron qurğularını sıradan çıxaracaq”. Yavər Camalov daha sonra deyib ki, Azərbaycanın əsas məqsədi uzaq mənzilli raketlərin istehsalıdır və bu istiqamətdə də dünyanın hərbi şirkətləri ilə danışıqlar aparılır.
Bu il üçün dövlət sifarişi proqramının artıqlaması ilə yerinə yetirildiyini vurğulayan nazir güc strukturlarına təhvil verilən müdafiə təyinatlı məhsulların həcminin 1,6 dəfə, çeşidinin isə 1,8 dəfə artdığını da söyləyib. Yaxın perspektivdə Azərbaycanın əsas məqsədləri sırasında uzaqmənzilli raketlərlə bərabər “Hava-Hava”, “Hava-Yer” tipli raketlərin istehsalı olduğunu bildirib: “Bununla bağlı artıq dünyanın aparıcı hərbi şirkətləri ilə ilkin razılıq da əldə olunub”.
Ən önəmlisi, Y.Camalov Azərbaycan Müdafiə Nazirliyi ilə İsrailin müvafiq qurumu arasında “Dəmir günbəz” Raket Hücumundan Müdafiə Sisteminin alınmasına dair razılaşma əldə olunduğunu deyib. O, Müdafiə Sənayesi Nazirliyinin həmin sistemin alınmasına müsbət rəy verdiyini də qeyd edib.
***
Xatırladaq ki, “Dəmir günbəz” Raket Hücumundan Müdafiə taktiki sistemi uçuş məsafəsi 4 km-dən 70 km-dək olan, idarə edilməyən taktiki raketlərdən müdafiə üçün nəzərdə tutulur. Sistem İsrailin “Rafael” şirkəti tərəfindən yaradılıb. Lakin son bilgilərə görə, “Dəmir günbəz”in daha çox uçuş məsafəsi olan raketləri zərərsizləşdirən modifikasiyası da var və əslində Azərbaycan məhz onu almaq istəyir.
Hərbi ekspertlərə görə, bu reallaşarsa, o zaman Ermənistan ona verilən “İsgəndər” komplekslərinin yaratdığı taktiki üstünlükdən məhrum olacaq. Bu da hamısı deyil. Nazirin açıqlamalarında o da bəlli olub ki, qısa müddət ərzində Müdafiə Sənayesi Nazirliyinin müəssisələrində yaradılmış yeni növ kamikadze tipli “Zərbə” və kəşfiyyat-müşahidə xarakterli pilotsuz uçuş aparatlarının (PUA) sınaqları uğurla başa çatdırılıb və artıq Ali Baş Komandanın iştirakı ilə təqdimatı da keçirilib.
“Azərbaycan Silahlı Qüvvələrini yeni növ ”Zərbə” pilotsuz uçuş aparatları ilə təmin etmək üçün yaxın vaxtlarda bu məmulatın seriyalı istehsalına başlanacaq. Bununla bağlı Müdafiə Sənayesi Nazirliyi ilə Müdafiə Nazirliyi arasında anlaşma memorandumu da imzalanıb” – nazir əlavə edib.
Bütün bunlar, sözsüz ki, Qarabağ danışıqlarını sabotaj edən işğalçı Ermənistana aydın bir mesajdır ki, sülhdən qaçmaq ona neçəyə başa gələr və müharibədə onu nələr gözləyir. Təbii ki, heç kim müharibə, qırğın, dağıntı arzulamır. Ancaq nə edəsən ki, erməni tərəfinin israrla qaçdığı ədalətli sülhün alternativi müharibədir. Klassik formulu burda yada salsaq, Azərbaycan sülh istəyirsə, gərək müharibəyə hazır olsun.
Ancaq bu, əlbəttə ki, son variantdır. Azərbaycan rəhbərliyinin bəyan etdiyi kimi, hələ ki sülhün imkanları tükənməyib. Savaş hüququnu isə Azərbaycan xalqının əlindən heç kim almayıb və ala bilməz. Sadəcə, bu məsələdə yüz ölçüb-bir biçməli, ən uğurlu məqamı gözləməliyik. Çünki Ermənistanın arxasında hansı gücün dayandığını ciddiyə almaq zorundayıq.
***
“Rəsmi və ictimai şəxslərin, o cümlədən təşkilatların emosional müharibə çağırışı ilə məsələ həll edilmir”. Bunu əksər deputatların müharibə çağırışını şərh edərkən politoloq Tofiq Abbasov deyib (sherg.az). Onun sözlərinə görə, hazırkı şəraitdə Azərbaycanın Ermənistana müharibə elan etməsi tezdir.
“Ermənistan elə nataraz dövlətdir ki, onu hazırlıqsız vəziyyətdə yaxalamaq lazımdır. Lakin burada Azərbaycanın beynəlxalq institutların qarşısındakı öhdəliyini unutmaq olmaz. Sülh prosesində Ermənistan nə qədər danışıqlardan yayınıb, önəmli məsələləri sonrakı plana ataraq, münaqişənin həlli prosesini ləngitməyə çalışsa da, biz diplomatik səviyyədə dözümlülüyümüzü sona qədər saxlamalıyıq. Qarşıdan gələn danışıqlarda Ermənistan destruktiv mövqe nümayiş etdirərsə, o zaman, bu addımı atmaq olar”, – deyə o qeyd edib.
Politoloq bildirib ki, Azərbaycan hələ 90-cı illərin sonlarından işğalçı dövlətə sülh prosesini ləngitməmək barədə ciddi xəbərdarlıq edib. “Dünya birliyində Ermənistana havadarlıq edən qurumlar və ölkələr açıq dəstəyini göstərir və onun mövqeyini müdafiə edirlər. Hətta Minsk qrupunun həmsədri olan Ceyms Uorlik bu məsələni aydın ifadə edir. Bu səbəbdən, elə məqamda bu addımı artmaq lazımdır ki, həmin təsisatlar Azərbaycana təzyiq göstərə bilməsinlər. Təklif edirəm ki, önümüzdəki bir neçə il müharibə barədə ciddi addımlar atılmasın. Lakin yenə də Azərbaycanın bütün göstəricilərə görə Ermənistandan xeyli irəlidə olduğu bəllidir. Bu hərbi hazırlığa, ordu quruculuğuna, demoqrafik vəziyyətə, iqtisadi göstəricilərə də aiddir. Ermənistan isə aprel döyüşlərindən sonra sözün əsl mənasında təşviş içərisindədir. Bütün bunları nəzərə alaraq, istisnaları zərərsizləşdirdikdən sonra müharibə elan edə bilərik” – T.Abbasov deyib.
O əlavə edib ki, bəzi rəsmilərin bu çağırışları emosional xarakter daşıyır: “Ermənilər öz istəyi ilə işğal edilmiş torpaqlarımızdan geri çəkilməsə, zərərçəkmiş tərəf olaraq, zərbə endirməliyik”.
Son şərhlər