“Ermənistan daxilində elə bir qrup əsgərlər vardır ki, onlar özlərini 44 günlük müharibədə məğlub olmuş hesab etmirlər. Bu qrup həmin müharibədə Azərbaycanın qarşısında möhkəm dayanmış və Azərbaycan Ordusunun həmin ərazilərdən hücumuna mane olmuş, onun qarşısını almış əsgərlərdir. Bunların sayı təxminən 20 min idi, çünki bizim ordu Şuşanı azad edəndə, deyilirdi ki, təxminən 20 minlik qruplaşma mühasirəyə düşəcək. Bura Kəlbəcər istiqamətində döyüşən qruplaşmanı da əlavə etsək, böyük qüvvə edir”.
Bu fikirləri Elchi.az-a açıqlamasında BAXCP sədrinin müşaviri, politoloq Azər Qasımov söyləyib:
“Azərbaycan Ordusunun az irəliləmə əldə etdiyi bölgələr isə məlum idi: Ağdam, Füzuli, qismən Tərtər və Kəlbəcər istiqaməti.
Biz ermənilərin müqavimətini tam qırmışıq desək də, böyük ehtimalla, bu qruplaşmalar belə hesab etmir. Onların bir hissəsinin hələ Qarabağ ərazisində olduğu da bir faktdır.
Təbii ki, Ermənistan ordusu Azərbaycan Ordusunun qarşısında çox zəifdir. Amma Ermənistan təxribat törədib, məğlub olmaqdan əl çəkmir. Görünən odur ki, bu, məqsədli şəkildə edilir. Məqsədli şəkildə məğlub olmaq.
Əslində normal məntiq deyil, amma bu addım atılırsa, deməli, məqsəd vardır.
Hesab etmək olar ki, bu, davam edəcək. Məqsəd isə KTMT-nin və Rusiyanın onları qorumadığı görüntüsü yaradıb, Amerikanın regiona gəlməsini təmin etməkdir. Odur ki, təxribatlar getdikcə artacaq, Azərbaycan daha da Ermənistanın içərilərinə doğru çəkilməyə təhrik ediləcək ki, Amerika oyuna girsin. Sülh müqaviləsi isə əvvəldən də dediyimiz kimi mümkün şey deyil. Bu, regiondakı bütün oyunların sonu olardı. Bu isə həm Ermənistan daxilindəki, həm də beynəlxalq güclərə lazım deyil”.
Yeganə
Son şərhlər