Rusiyalı deputat: “Üç ilə Ermənistan Qarabağı və ətraf rayonları azad etməlidir…”
“Bir il ərzində Qarabağətrafı rayonlar, üç ilə isə Dağlıq Qarabağ azad olunmalıdır”. Bunu salamnews-un Moskva müxbirinə eksklüziv müsahibəsində Rusiya federasiyasının Dövlət Dumasının deputatı, maliyyə bazarı üzrə Komitənin sədr müavini, Rusiya Liberal-Demokrat Partiyasının parlament fraksiyasının üzvü Dmitriy Savelyev deyib.
Münaqişənin tənzimlənməsinin perspektivlərinə dair sualı cavablandıran deputat həll prosesində Rusiyanın vasitəçiliyinin perspektivlərinə şübhə etmir: “Hesab edirəm ki, Dağlıq Qarabağ münaqişəsinin həllində Rusiyanın rolu başqa cür olmalıdır. Mən əminəm ki, münaqişə Ermənistan xalqı üçün də sərfəli deyil. İstərdik ki, bir il ərzində Qarabağdan əlavə, Ermənistan tərəfindən zəbt edilmiş rayonların azad olunması məsələsi tənzimlənsin, üç ilə isə Dağlıq Qarabağ azad olunmalıdır. Erməni xalqı öz hakimiyyətinin apardığı siyasətin əsiridir. Nəticə etibarı ilə Ermənistanda biz nə görürük? Tam şəkildə səfalət. Orada həm mədəniyyət, həm də təhsil sahələrində problemlər mövcuddur. Azərbaycanın bütün sahələrdəki göstəriciləri hara, Ermənistanın hara. Çox böyük fərqdir. Axı hər şey iqtisadiyyat əsasında qurulur. Orada, əlbəttə ki, Sovet İttifaqı dövründə əsası qoyulmuş potensialın davamlılığının müəyyən ehtiyatı hələlik mövcuddur, lakin hər şeyin sonu var. Bu dəstəklənməsə, inkişaf etdirilməsə, hər şey baxımsızlığa düçar olacaq. Və hazırda Ermənistanda müşahidə olunan da budur”.
Deputat işğalçı ölkədəki səfalət və başqa sosial-iqtisadi problemlərə xüsusi toxunub: “Baxın, Ermənistanda nə qədər erməni yaşayır, nə qədər erməni isə ölkəsindən kənarda? Onlar mahiyyətcə ayaqları ilə səs verirlər. Onlar kütləvi şəkildə oranı tərk edirlər. Orada hazırda vur-tut 2 milyona qədər əhali qalıb. İnsanlar bu ərazini tərk edir, hər şey deqradasiyaya uğrayır. Onlar üçün də bu, problemdir, onlara da bu münaqişəni həll etmək lazımdır. Və Azərbaycana, əlbəttə ki, ilk növbədə bu münaqişəni tənzimləmək zəruridir, bu ölkənin və xalqın ağrılı bir nöqtəsidir və prezident Əliyev görüşdə bəyan edib ki, məsələ həll olunmalıdır. Mən onunla tamamilə razıyam. Bu münaqişəni həqiqətən də həll etmək lazımdır, özü də ən qısa bir zamanda, onilliklərlə yox. Mən sülh yolu ilə nizamlanma yoluna inanıram, çünki bilirəm ki, heç də hər şey müharibə ilə həll olunmur. Və bu mənada Rusiyanın rolu həlledici olmalıdır”.
Son şərhlər