ABŞ və Avropa fond bazarlarında 24 noyabr sessiyası əsasən artım ilə başa çatıb.
Elchi.az xəbər verir ki, ABŞ indeksləri- Dow Jones Industrial Average 0,44% artaraq 46 448,27 bəndə, S&P 500 indeksi 1,55% artımla 6 705,12 bənd səviyyəsinə yüksəlib. Nasdaq Composite 2,69% yüksələrək 22 872,01 bənd təşkil edib. NYSE Composite 0,45% artımla 21 271,60 bənd olub. Kanada S&P/TSX Composite indeksi isə 1,47% artaraq 30 604,35 bənd səviyyəsində qeydə alınıb.
Avropa bazarlarında da indekslərdə əsasən artım müşahidə edilib. Euro Stoxx 50 indeksi 0,25% yüksələrək 5 528,67 bəndə çatıb. Almaniyanın DAX indeksi 0,64% artaraq 23 239,18 bənd olub. İspaniyanın IBEX 35 indeksi 0,92% artım nümayiş etdirərək 15 967,80 bənd səviyyəsinə yüksəlib. Böyük Britaniyanın FTSE 100 indeksi 0,05% azalaraq 9 534,91 bənd təşkil edib. Fransanın CAC 40 indeksi isə 0,29% geriləyərək 7 959,67 bənd səviyyəsində bağlanıb.
Analitiklər qeyd edirlər ki, sessiyanın ümumi artım meyli investorların inflyasiya və faiz dərəcələri ilə bağlı daha yumşaq gözləntilərinə bağlanır. ABŞ-da son makroiqtisadi göstəricilərin Federal Ehtiyat Sisteminin faiz artırımlarını dayandıracağı ilə bağlı gözləntiləri gücləndirməsi texnoloji sektorun aparıcı rolu ilə indekslərdə yüksəlişi dəstəkləyib. Avropada isə enerji qiymətlərində stabilləşmə və sənaye sektorundan gələn müsbət siqnallar bəzi indekslərdə artım yaratsa da, Fransada və Böyük Britaniyada şirkət gəlirlərinin zəif görünməsi lokal geriçəkilmələrə səbəb olub.
