Daxili İşlər Nazirliyi dünən Tərtər Rayon Polis Şöbəsində vəfat edən şəxslə bağlı açıqlama verib.DİN-in mətbuat xidmətinin əməkdaşı Ehsan Zahidov “Qafqazinfo”ya açıqlamasında bildirib ki, Ağdam rayon sakini, 1982-cil il təvəllüdlü Dünyamalıyev Səbuhi Zamin oğlu bir müddət öncə narkotik vasitə ilə saxlanılıb: “Dünən Tərtər Rayon Polis Şöbəsinin müvəqqəti saxlanma yerində mələfə ilə dəmir barmaqlıqdan özünü asaraq intihar edib. Meyit məhkəmə tibbi ekspertiza və həkim ekspertizasından keçirilib. Nəticələr barədə mərhumun qohumlarına və ictimaiyyətə məlumat veriləcək.
Hadisədən sonra qohumları şöbənin qarşısına toplaşıb. Onlara hər şey izah olunandan sonra dağılışıblar. Hal-hazırda məsələ ilə bağlı rayon prokurorluğunda və rayon polis şöbəsində araşdırmalar aparılır. Araşdırmalara başa çatandan sonra daha geniş və ətraflı məlumat veriləcək. Həmin şəxsə işgəncə verilməsi, döyülməsi haqda deyilənlər yalandır”.
“Polis Şöbəsində quraşdırılan video-kameranın görüntülərindən araşdırmada istifadə oluna bilərmi?” sualına DİN rəsmisi belə cavab verib: “Daxili İşlər Nazirliyinin bütün qurumlarındakı saxlanma yerləri müasir standartalara uyğunlaşdırılıb. Rayon Polis şöbəsində quraşdırılan video-kameranın görüntülərindən istifadə olunub-olunmayacağı haqda rayon prokurorluğunun araşdırmaları başa çatmamış bir söz deyə bilmərəm”.
Xatırladaq ki, dünən mediada Dünyamalıyevin təcridxanada məruz qaldığı işgəncələrdən öldüyü bardə məlumat yayılmışdı. Məlumatda qeyd olunurdu ki, bu da onun qohumlarını və yaxınlarını qəzəbləndirib. Onlar polis şöbəsinə hücum ediblər.
Son şərhlər