Akif Təvəkküloğlu: “ Bu məlumatı kimsə ortaya atıb, hər kəs də çaş-baş qalıb”
Mətbuatda Milli Məclisin uzun müddətdir ki, mənzil-ev növbəsinə dayanan 54 nəfər sabiq və indiki deputatlarına ev veriləcəyi ilə bağlı məlumat yayılıb. Gununsesi.info-nun yaydığı məlumatda bildirilib ki, 54 nəfər sabiq və indiki millət vəkilinin uzun illərdən bəri davam edən mənzil-ev növbəsi “həsrəti”nə son qoyulub. Sabiq və indiki deputatlar mənzillərinə “qovuşmaq” üçün nə az-nə çox, düz 13 il gözləməli olublar.
Sayt bildirir ki, paytaxtın “Ağ şəhər” deyilən ərazisinə yaxın yerdə (Gürcüstan, Belarus, Ukrayna, Qazaxıstan səfirliklərinin yaxınlığında) “KAT Ltd” tərəfindən tikintisinə 2003-cü ildən başlanan 2 bloklu 12 mərtəbəli göydələnin istifadəsi 2016-cı ilin dekabr ayının son günlərində baş tutub. “Məlumatlı mənbənin bildirdiyinə görə, binanın tikintisinin bu qədər uzun çəkməsi isə hazırda iflas həddində olan adıçəkilən tikinti şirkətinin məsuliyyətsizliyi və səhlənkarlığı üzündən olub” deyə, məlumatda qeyd olunur.
Qeyd olunur ki, yeni binada mənzil alanlar arasında spiker Oqtay Əsədov, Milli Məclisin (MM) Əmək və sosial siyasət komitəsinin sədri Hadi Rəcəbli, parlamentin Elm və təhsil komitəsinin sədr müavini Bəxtiyar Əliyev, Milli Məclis Aparatının Komitə və komissiyalar ilə iş şöbəsinin müdir müavini, sabiq millət vəkili Rifət Ağalarov, Konstitusiya Araşdırmalar Fondunun prezidenti Əliməmməd Nuriyev də var.
Lakin məlumatı Milli Məclisin mətbuat xidməti təsdiqləmədi. Belə ki, xəbəri dəqiqləşdirmək üçün müraciət etdiyimiz Milli Məclisin mətbuat xidmətinin rəhbəri Akif Təvəkküloğlu “Yeni Müsavat”a söylədi ki, bu barədə onda heç bir məlumat yoxdur: “Mənbəyi olmayan bu informasiya ilə bağlı mənə çoxsaylı müraciətlər olub. Təki deyildiyi kimi deputatlara ev verilsin. Ancaq bu barədə bizdə heç bir məlumat yoxdur. Bu məlumatı kimsə ortaya atıb, hər kəs də çaş-baş qalıb. Halbuki bunun heç bir mənbəyi də yoxdur. Bununla bağlı informasiya heç olmasa deputatlardan birinin dilindən çıxaydı, düşünərdik ki, yəqin məlumat buradan qaynaqlanıb. Ancaq belə bir hal da olmayıb axı… İlk gündür işə gəlmişik, bu cür xəbərlə üzləşmişik. Bir daha qeyd edirəm ki, bizdə bununla bağlı heç bir informasiya yoxdur. Mənbəyi olmayan informasiyalara çox diqqət etmək lazım deyil”.
Məlumatda adı çəkilən Əlməmməd Nuriyev də bildirdi ki, bu xəbər doğru deyil: “Bu, tamamilə yanlış məlumatdır. Baxmayaraq ki, 2003-cü ildən kooperativ mənzil növbəsindəyəm, ancaq mən hər hansı bir mənzil almamışam. Ondan əvvəl də hələ 1992-ci ildən mənzil növbəsində idim. Nə Prezident Administrasiyasinda, nə də Milli Məclisdən ev vermədilər. Daha sonra dediyim kimi, kooperativ mənzil növbəsinə durmuşdum, oradan da ev almamışam. Bilirəm ki, hazırda tikinti işləri gedir və orada çox böyük mübahisəli məsələlər var. O məsələlər öz həllini tapmalıdır. Bugünlərdə mənzil verilməsi ilə bağlı hər hansı bir xəbər, məlumat almamışam”.
Onu da qeyd edək ki, 2009-cu ildə 40-a yaxın deputat mənzillə təmin olunub. Mənzillər deputatlara onların rəsmi şəkildə müraciətindən sonra paylanıb. Mənzil alan deputatlar sırasında Pənah Hüseyn istisna olmaqla, bütün müxalifətçi deputatlar olublar.
Son şərhlər