Tərlan Eyvazovla tanışlığımın tarixi hələ ordu sıralarında birgə xidmət etdiyimiz dövrlərə təsadüf edir. O, Azərbaycan Silahlı Qüvvələrinin yarandığı ilk illərdən, necə deyərlər, Vətənin səsinə səs verən ziyalılarımızdandır.
Hələ ali təhsil ocağına daxil olmamışdan öncə, Əfqanıstanda keçdiyi döyüş yolu, qazandığı təcrübə Tərlan Eyvazovun sonrakı xidmətində də önəmli rol oynayıb. Qrup rəhbərindən xüsusi təyinatlı hərbi hissə komandirinin müavini vəzifəsinədək yüksəlib. Azərbaycanın Milli Qəhrəmanı mərhum Eldar Ağayevin rəhbərliyi altında xidmət edib; verilən əmr və tapşırıqları layiqincə yerinə yetirən, vəzifələrinə məsuliyyətlə yanaşan zabit kimi tanınıb.
Sonradan öz xahişilə ordu sıralarından tərxis olunan Tərlan Eyvazov, həm də pedaqoji sahədə səmərəli fəaliyyətilə seçilib. Axı o, Azərbaycan Dövlət Pedaqoji Universitetinin bədii qrafika fakültəsini qırmızı diplomla bitirən azsaylı məzunlardandır. Bir müddət yaradıcılıqdan uzaq düşsə də, sonradan taleyin hökmü ilə yenidən sevdiyi peşəyə – rəssamlığa qayıdıb.
Hərbi xidmət, vətənpərvərlik və humanizm Tərlan müəllimin yaradıcılıq axtarışlarının əsas qayəsidir. Hələ ötən il Silahlı Qüvvələr Günü ərəfəsində döyüşçü rəssamların sərgisini təşil etməsi də, bu sadə və səmimi insanın vətəndaş mövqeyindən qaynaqlanır. Rəssamlar İttifaqının üzvü kimi, bu yöndə özünü sınaması müəllifin, necə deyərlər, haqq etdiyi qabarıq məqamlardandır.
Fikrimcə, Tərlan Eyvazov fırçasının və rənglərin dililə vətənpərvərliyi, insanlığı, təvazökarlığı və səmimiyyəti yaradıcılıq axtarışlarının əsas elementinə çevirməyi, öz sözunu çox sadə və aydın şəkildə tamaşaçılara çatdırmağı ustalıqla bacarır. Onun ürək çırpıntılarını isə hamıdan aydın və obrazlı şəkildə müəllifi olduğu əsərlər ifadə edir. Gəlin bu əsərlərə birlikdə qulaq asaq…
İbrahim RÜSTƏMOV,əməkdar jurnalist