“Rusiya-Çin münasibətlərinə soyuq müharibə zehniyyəti əsasında qiymət verənlər düzgün mühakimə yürüdə bilməzlər”.
Elchi.az News.am-a istinadən xəbər verir ki, bu fikirləri Çin Xalq Respublikası Müdafiə Nazirliyinin rəsmi nümayəndəsi Tan Kefei ABŞ Silahlı Qüvvələrinin Qərargah Rəisləri Komitəsinin sədri Mark Millinin Rusiya ilə hərbi ittifaq barədə bəyanatını şərh edərkən deyib.
“Başqalarını öz standartları ilə ölçənlərin mesajı və arqumentləri Soyuq Müharibə dövrünün məhdud və köhnəlmiş düşüncəsindən irəli gəlir. Onlar Rusiya-Çin münasibətlərini yanlış qiymətləndirirlər və düzgün mühakimə edə bilmirlər”, – deyə Kefei bildirib.
O, qeyd edib ki, Rusiya və Çin liderlərinin strateji rəhbərliyi altında ölkələr böyük dövlətlərin qarşılıqlı etimadına və qonşuluğuna zəmin yaradıb, yeni beynəlxalq münasibətlər modeli qurulub:
“Yeni dövrdə Çin və Rusiya arasında hərtərəfli əməkdaşlıq və tərəfdaşlıq əlaqələrinin inkişafı, iki ölkənin hərbçiləri arasında mübadilə və əməkdaşlığın dərinləşməsi təkcə iki ölkə xalqlarının köklü maraqlarına uyğun gəlmir, həm də öz töhfəsini verir. Bütün bunlar beynəlxalq ədalətin qorunmasına, eləcə də qlobal və regional təhlükəsizliyin və sabitliyin qorunmasına xidmət edir”.
Xatırladaq ki, ABŞ Silahlı Qüvvələrinin Qərargah Rəisləri Komitəsinin sədri Mark Milli daha əvvəl bəyan etmişdi ki, ABŞ Rusiya və Çin arasında strateji hərbi müttəfiqliyi pozmaq üçün hər şeyi edəcək. Milli etiraf edib ki, Vaşinqton Moskva ilə Pekin arasında yaxınlaşmanın sübutunu görür və ABŞ-a qarşı geostrateji, siyasi və hərbi ittifaqın qarşısını almaq niyyətindədir.
Yeganə