Çin, COVID-19 pandemiyasından sonra ölkəyə beynəlxalq səyahətləri artırmaq üçün 2023-cü ildə başlatdığı birtərəfli viza güzəşti proqramına Böyük Britaniyanı da daxil edəcəyini açıqladı.
Elchi.az xəbər verir ki, Böyük Britaniya hökuməti Baş nazir Keir Starmerin Çinə səfəri zamanı tərəflər arasında viza güzəşti razılaşmasının əldə edildiyini açıqladı.
Müvafiq olaraq, Britaniya vətəndaşları Çinə 30 gündən çox olmayan müddətə vizasız səyahət edə biləcəklər.
Məsələ ilə bağlı açıqlamasında Baş nazir Starmer, Britaniya şirkətlərinin dünyanın ən vacib iqtisadi güc mərkəzlərindən biri olan Çində iştirak etmək üçün yollar axtardığını və qısamüddətli səyahətlər üçün viza güzəşti təmin edən bu tənzimləmənin onlara daxili artımı və məşğulluğu gücləndirərkən xaricdə bizneslərini genişləndirməyə imkan verəcəyini vurğuladı. Covid-19 pandemiyası tərəfindən pozulan beynəlxalq səyahət və turizmi canlandırmaq məqsədi daşıyan Çin, müxtəlif ölkələrlə vizasız müqavilələr bağlayaraq səyahətləri təşviq etmək üçün addımlar atdı.
2023-cü ilin dekabr ayında Pekin administrasiyası əvvəlcə 6 ölkə ilə başlayan və 15 günlə məhdudlaşdırılan vizasız proqramı 30 günə qədər uzatdı, daxil olan ölkələrin sayını 47-yə çatdırdı və 55 ölkənin vətəndaşlarına 10 günə qədər vizasız giriş imkanı verdi.
Çinin həmçinin 29 ölkə ilə qarşılıqlı vizasız müqavilələri var.
Böyük Britaniyanın Baş naziri Starmer 8 ildən sonra Çinə səfər edən ilk Britaniya Baş naziri oldu.
28 yanvarda üç günlük səfər üçün Pekinə gələn Starmer Pekin və Şanxayda danışıqlar aparacaq.
Ölkəyə səfər edən sonuncu Britaniya Baş naziri 2018-ci ildə Tereza Mey olub.
Şayəstə
