Demokratiyanın və Milli Dəyərlərin İctimai Birliyinin ikinci təlimində bu mövzuda danışıldı
Demokratiyanın və Milli Dəyərlərin Təbliği İçtimai Birliyi Azərbaycan Respublikası Prezidenti yanında Qeyri-hökumət Təşkilatlarına Dövlət Dəstəyi Şurasının maliyyə dəstəyi ilə başladığı layihə çərçivəsində Bakı şəhəri 64 saylı tam orta məktəbdə “Məktəblərdə şagirdlər arasında vətənpərvərlik hissinin aşılanması istiqamətində sinifdənxaric fəaliyyətin təşkili” mövzusunda bu gün növbəti təlimini reallaşdırdı.
Təlim Azərbaycan Respublikasının Dövlət Himnini səsləndirməklə başlandı. İlk söz layıhənin rəhbəri, İctimai Birliyin sədri Əli Cəfərova verildi. Layihə rəhbəri sagirdləri salamladıqdan sonra bir daha layihənin məqsəd və vəzifələri haqqında onlara qısa məlumat verərək bildirdi ki, yasadığımız dövrdə yeniyetmə gənclər arasında sağlam həyat tərzi keçirməyən, təhsildən, eləcə də milli-mənəvi dəyərlərimizdən uzaq düşən kifayət qədər gənclərimiz vardır. Bunun nəticəsidir ki, yetişməkdə olan gənc nəsil arasında vətən sevgisi hissləri çox aşağı səviyyədədir. Onlar Milli Qəhrəmanlarımız, eləcə də 20 Yanvar Şəhidlərimiz haqqında çox səthi biliklərə malikdirlər: “Bir daha bildirirəm ki, bizim layihəmizin əsas mahiyyəti gənclərin asudə vaxtlarını səmərəli təşkil etməklə yanaşı, bu imkandan yararlanıb onlara milli ruh – Vətən, 20 Yanvar, Qarabağ şəhidləri, Qarabağ müharibəsi haqqında müfəssəl bilgilər verməkdən ibarətdir. Layihə vətənpərvərlik tərbiyəsinin bütün detallarının geniş ictimaiyyətə təbliğ olunmasından və bu təbliğata maneçilik törədən qeyri-təbii amillərin aradan qaldırılmasından bəhs edir”.
Daha sonra layıhə rəhbəri bildirdi ki, növbəti təlimlərdə Səhidlər Xiyabanına gedib şəhidlərimizin məzarı önündə tədbirimizi davam etdirəcəyik. Sonra layihə rəhbəri sözü təlimçi Cavid Cəfərzadəyə verərək layihənin hədəflərinə çatmaq yönündə onun şagirdləri bilgiləndirməsinə şərait yaratdı. Təlimçi uşaqlara ötən təlimdə keçdiyi mövzularla əlaqədar yönəldici suallar verərək onların indiyədək mənimsəmiş olduğu bilikləri bir daha möhkəmləndirdi. Suallar təxminən aşağıdakı aspektləri əhatə edirdi: “Vətən hardan başlanır”, “20 Yanvar hadisələri niyə baş verdi”, Xocalı soyqırımının mahiyyətini necə izah edə bilərsiniz” və s. Şagirdlərdən Kamran, Zəhra, Pəri, Cavansir, Nicat, Aydan, Fərid, Şəfa, Əmrah və başqaları müxtəlif cavablarla fikirlərini sərbəst ifadə etməyə çalışırdılar. Daha sonra təlimçi həmçinin Azərbaycan filmlərindən nümunələr gətirərək bu filmlərin konkret faktlar əsasında ərsəyə gətirildiyini söylədi və Azərbaycan xalqının necə mübariz bir qəhrəman xalq olduğunu təlim iştirakçılarına izah etdi.
Təlim zamanı 20 Yanvar hadisələrindən bəhs edən video-rolik nümayış etdirildi. Sonra qısa müzakirələr aparıldı. Mövzu ilə əlaqədar müxtəlif yönümlü suallar və tapşırıqlarla uşaqlar fikirlərini sərbəst ifadə etdilər. “Fəryad”, “Xoca”, “Babək” , “Dolu” , “ Dədə Qorqud”, “Qanlı Zəmi”, “Babək” və s. filmlərdən sitatlar gətirildi. Təlimçi yuxarıda sadalanan filmlərdən epizodlar göstərərək filmlərdəki mesajları uşaqlara izah etdi. “Babək” filmində azadlıq sevgisini, “Fəryad” filmində Azərbaycan əsgərinin vüqarını, “Xoca” filmində Xocalı müsibətlərini, “Dolu” filmində rəhm, mərhəmət, elə-obaya sevgi hisslərini, “Dədə Qorqud” filmindən böyük-kiçiyə hörmət, milli birlik, əxlaqi kamillik kimi ideyaları uşaqlara izah etdi. Bununla yanaşı “Qanlı Zəmi” filmində əks olunan Vahid Azərbaycan – o taylı, bu taylı soydaşlarımızın milli birlik sevdası izah olundu. Uşaqlar da filimlərlə bağlı öz fikirlərini izah etməyə çalışdılar. Təlimçinin də koməyi ilə uşaqlara filmlər əhatəli izah olundu.
Müzakirələrdən sonra təlimçi bildirdi ki, Qarabağ dünənin, bu günün, sabahın problemidir. Bu mövzuda təlimlərin, tədbirlərin orta məktəblərdə təbliği uşaqlarda vətənə, ətraf mühitə, ailəyə, cəmiyyətə sevgi hisslərini aşılayır, bununla yanaşı onları şəxsiyyətyönümlü bir vətəndaş kimi formalaşmağa sövq edir.
Son şərhlər