Bəhreyn 2017-ci ildə başlayan körfəz böhranından 6 il sonra Qətərə uçuşları bərpa edəcəyini açıqlayıb.
Elchi.az xəbər verir ki, Bəhreynin rəsmi xəbər agentliyi BNA-nın verdiyi məlumata görə, Bəhreyn Mülki Aviasiya Administrasiyasının məsələ ilə bağlı qərarından sonra iki ölkənin müvafiq qurumları uçuşların bərpası ilə bağlı razılığa gəliblər.
Bəhreynin milli aviaşirkəti Gulf Air tezliklə Bəhreyn Beynəlxalq Hava Limanından Qətərin paytaxtı Dohadakı Hamed Beynəlxalq Hava Limanına gündə 3 uçuş həyata keçirəcək.
Digər tərəfdən, Gulf Air-in baş direktoru Valid əl-Allavi, 25 may 2023-cü il tarixindən etibarən “Gulf Air”in Dohaya uçuşlarına yenidən başlaması qərarından məmnunluğunu ifadə edib.
Qətər-Bəhreyn münasibətləri
Səudiyyə Ərəbistanı, Birləşmiş Ərəb Əmirlikləri, Bəhreyn və Misir 5 iyun 2017-ci ildə “terrorçu qrupları dəstəklədiklərini” iddia edərək Qətərlə bütün diplomatik əlaqələrini kəsib və bu ölkəyə iqtisadi embarqo tətbiq etməyə başlayıblar.
Qətər sözügedən ölkələrin bütün ittihamlarını rədd edərkən, bu vəziyyət Körfəz bölgəsində böhrana səbəb olub.
5 yanvar 2021-ci ildə Səudiyyə Ərəbistanının Əl-Ula şəhərində keçirilən Körfəz Əməkdaşlıq Şurasının 41-ci Zirvə Toplantısında imzalanan Ula Bəyannaməsi ilə Körfəz böhranı həll edildi. Lakin Doha və Manama arasında bəzi həll edilməmiş problemlər səbəbindən diplomatik münasibətlərin bərpası ləngiyib.
Qətər və Bəhreyn aprelin 13-də iki ölkə arasında diplomatik münasibətləri bərpa etmək qərarına gəlib.
Nuranə Məmmədova
Son şərhlər