Almaniya Parlamentinin sədri Julia Klöckner “DPA” xəbər agentliyinə müsahibəsində deyib ki, Bundestaq daim kiberhücumlara məruz qalır və onun hakerlərdən daha yaxşı müdafiəyə ehtiyacı var.
Elchi.az bu barədə “Reuters”ə istinadən xəbər verir.
“Biz çoxsaylı haker hücumlarını qeydə alırıq – Bundestaq məşhur hədəfdir”, – deyə agentlik onun sözlərini sitat gətirir.
Onun sözlərinə görə, parlament hakerlərin hərəkətlərinə qarşı mübarizə aparmaq imkanlarını artırmalıdır.
İyunun əvvəlində Almaniyanın daxili işlər naziri Aleksandr Dobrindt və Federal Cinayət Axtarış İdarəsinin direktoru Holqer Münx bildiriblər ki, 2024-cü ildə Almaniyada 131 391 kibercinayət qeydə alınıb ki, bu da əvvəlki illə müqayisədə 2,2 faiz azdır.
Almaniya hüquq-mühafizə orqanları həmçinin Almaniyaya xaricdən və ya naməlum yerdən 201 877 kibercinayətkar hücumu qeydə alıb ki, bu da 2023-cü illə müqayisədə 6 faiz çoxdur.
Bu arada, dövlət qurumlarının və digər təşkilatların işinin şəbəkələrin qəsdən həddən artıq yüklənməsi ilə bloklandığı DDoS adlanan hücumların sayı 30,7 faiz artıb. Almaniyada bu cür cinayətlərin çoxu Rusiyadan qeydə alınıb.
Yeganə
