“Büdcədə sənaye və tikinti xərclərinə 7 milyard vəsait nəzərdə tutulub”

İqtisadi və Sosialİnkişaf Mərkəzinin rəhbəri, iqtisadçı ekspert Vüqar Bayramovun sözlərinə görə, 2015-ci ilin dövlət büdcəsini əvvəlki illər ilə müqayisədə sosial yönümlü hesab etmək olar: “2015-ci ilin dövlət büdcəsi layihəsində mütləq ifadədə sosial istiqamətə 5 milyard 826,4 milyon manat vəsait proqnozlaşdırılıb ki, bu da 2014-cü ilə nisbətən 489,2 milyon manat və ya 9,2 faiz, 2013-cü ilin faktiki icra göstəricisi ilə müqayisədə isə 920 milyon manat və ya 18,8 faiz çoxdur. Belə ki, sosial yönlü xərclərə ayrılan vəsaitin 3 milyard 452,4 milyon manatının əmək haqlarına, 1 milyard 845 milyon manatının təqaüdlər və sosial müavinətlərə yönəldilməsi nəzərdə tutulur. Təqaüdlər və sosial müavinətlərə ayrılan xərclər 2014-cü ilin proqnozu ilə müqayisədə cəmi 24,7 milyon manat çoxdur. Əmək haqlarına ayrılan xərclər isə 2014-cü ilin proqnozu ilə müqayisədə 417,7 milyon manat çoxdur.

 Ümumilikdə, ölkədə əhalinin sosial vəziyyətinin daha da yaxşılaşdırılması, o cümlədən pensiya və müavinətlərin, ünvanlı sosial yardımın, məcburi köçkünlərin sosial məsələlərinin və digər sosial tədbirlərin maliyyə təminatı üçün 2015-ci ilin dövlət büdcəsində sosial müdafiə və sosial təminat xərcləri üçün 2 milyard 40,5 milyon manat vəsait proqnozlaşdırılıb. 2015-ci ildə sosial müdafiə və sosial təminat xərclərinə ayrılan vəsaitin 1 milyard 100 milyon manatı əmək pensiyalarının maliyyələşdirilməsinə yönəldiləcək. Digər sektorlara ayrılan vəsaitlərin iqtisadiyyata təsiri isə birbaşa həmin xərclərin reallaşma səviyyəsindən asılı olacaq. Sənaye və tikinti xərcləri üzrə 7 milyard manata yaxın vəsait nəzərdə tutulub”.

İqtisadçı ekspertin fikrincə, əgər dünya bazarında neftin qiyməti büdcədə nəzərdə tutulan qimyətdən aşağı olsa, o zaman Maliyyə Nazirliyi büdcə xərclərində azaltmalar edə bilər: “Əgər neftin qiymət proqnozlaşdırılandan az olarsa o zaman Maliyyə Nazirliyinin bu xərclərə sekvest tətbiq edərək azalması istisna edilmir. Təbii ki, “Büdcə Sistemi haqqında Qanun” heç bir halda müdafiə olunan, sosial xərclərin azaldılmasına imkan vermir. Bu isə o deməkdir ki, heç bir halda əmək haqqı və pensiya məbləğlərində azalma olmayacaq. Neftin dünya bazar qiymət gələn il dövlət büdcəsindəki qiymətə yaxın olarsa o zaman maliyyələşmədə ciddi problemlər olmayacaq. Əks halda hökumət “ad-hoc” metodlardan istifadə edərək büdcə gəliləri ilə xərclərini balanslaşdırmağa çalışacaq”.