Azərbaycanın indiki neft-qaz sənayesini inkişaf etdirib və paralel alternativ, bərpa olunan və təmiz enerji mənbələrini irəli apararaq gələcəkdə daha böyük və uğurlu enerji sektorunu qurmaq üçün imkanı var.Bu barədə BP-nin Azərbaycan, Gürcüstan və Türkiyə üzrə regional prezidenti Qəri Counz bildirib.
Onun sözlərinə görə, Azərbaycan zəngin neft-qaz mənbələri ilə yanaşı, alternativ və bərpa olunan enerji mənbələrinə malikdir və bu böyük imkanlar açır.
Qəri Counz onu da əlavə edib ki, hazırda BP Cəbrayılda 240 MVt gücündə günəş “Şəfəq” elektrik stansiyası layihəsinin irəli getməsi istiqamətində Azərbaycanın energetika nazirliyi ilə yaxında işləyir.
“Çox ümidlə baxırıq bu layihəyə. Hələlik kommersiya qərarı yoxdur, amma energetika nazirliyi ilə çox yaxından işləyirik ki, bu layihəni irəli aparaq. Hal-hazırda texniki işlər gedir.
Xatırladaq ki, bu ilin iyununda Energetika Nazirliyi və BP arasında Azərbaycanın cənub-qərb bölgəsində günəş elektrik stansiyası layihəsi ilə bağlı növbəti addımlar üzrə razılıq əldə edilib. Tərəflər arasında Cəbrayılda 240 MVt gücündə günəş elektrik stansiyası layihəsinin birgə həyata keçirilməsi ilə bağlı növbəti addımların atılması məqsədilə 2021-ci ilin iyun ayında bağlanmış İcra Müqaviləsinə Əlavə imzalanıb. Bu sənəd “Şəfəq” adlı günəş elektrik stansiyası layihəsinin reallaşdırılması istiqamətində birgə fəaliyyəti yekunlaşdırmaq üçün görüləcək tədbirləri əks etdirir.
İcra Müqaviləsinə edilmiş Əlavə sənədinə əsasən, layihənin icrasında effektiv texniki və kommersiya həllinə nail olmaq üçün “Virtual Enerji Ötürülməsi Mexanizmi” adlı biznes modelinin tətbiqi planlaşdırılır. Bu model layihə çərçivəsində Cəbrayılda günəş enerjisinin istehsalına və onun ölkənin digər hissələrində dövlət və ya özəl alıcılara satışına imkan yaradır.(apa)
Son şərhlər