Azərbaycanla BƏƏ arasında münasibətlərin inkişafı müşahidə olunur. İki dövlət arasında ticarət dövriyyəsi 2024-cü ildə 96 milyon 805 min dollar olub. 2021-ci ilə nisbətən ticarət dövriyyəsi 2 dəfə artasa da mövcud rəqəm potensialı tam əhatə etmir. Dövlətlər arası münasibətlərin daha da dərinləşməsinin ticarət dövriyyəsində də artımlar ilə müşahidə olunacağı gözlənilir.
Elchi.az xəbər verir ki, bu sözləri millət vəkili, iqtisadçı alim Vüqar Bayramov Birləşmiş Ərəb Əmirliklərinin (BƏƏ) Prezidenti Şeyx Məhəmməd bin Zayed Əl Nəhyanın Azərbaycana rəsmi səfər ilə bağlı deyib.
Onun sözlərinə görə, BƏƏ Azərbaycanda yaşıl enerjiyə sərmayə qoyuluşu həyata keçirən dövlətlərdəndir və tərəflər arasında innovativ sahədə əməkdaşlıq daha güclənməkdədir:
“Azərbaycan Prezidenti İlham Əliyevin BƏƏ Prezidenti Şeyx Məhəmməd bin Zayed Əl Nəhyanı Füzuli Beynəlxalq Hava Limanında qarşılamasının da xüsusi mənası var. Qarabağ və Şərqi Zəngəzurda inşa edilən hava limanları ilə bağlı müəyyən şəxslər qərəzli fikirlər irəli sürürdü. Son səfər də təsdiq edir ki, Qarabağa dünyanın fərqli ölkələrindən birbaşa uçuşlar var, hətta yüksək səviyyəli rəsmilər də xaricdən Azərbaycan gələrkən birbaşa Qarabağ bölgəsinə enə bilirlər.
Bütün bunlar bir daha sübut edir ki, Qarabağda inşa edilən hava limanları təhlükəsizlik, nəqliyyat, turizmin inkişafı, həm də beynəlxalq səfərlərin təşkili baxımından çox vacibdir. Azərbaycan ərazi bütövlüyünü tam bərpa edib və azad olunmuş torpaqlarımızda artıq rəsmi şəxslərin qəbulu da həyata keçirilir.
BƏƏ Prezidentinin Azərbaycana səfəri iki ölkə arasındakı münasibətlərin daha da dərinləşməsində yeni səhifə açacaq. Bu səhifə həm də Qarabağda açılır”.
