Neft Şirkəti “Çağ Öyrətim”lə birlikdə Aqil Ələsgəri məhkəməyə verdi.
Daha bir azərbaycanlı jurnalist həbs edilə bilər. Bu barədə açıqlamanı həbs edilməsi istənilən jurnalist-“Yeni Çağ” (yenicag.az) qəzetinin baş redaktoru Aqil Ələsgər verib. Fətullah Gülən ilə bağlı araşdırmalarına görə, təhdidlərin rəsmiləşdirildiyini bildirən baş redaktor Azərbaycan Dövlət Neft Şirkəti ilə “Çağ Öyrətim” tərəfindən məhkəməyə verildiyini bildirib:
“Maraqlıdır ki, mən dörd aydan bəri Gülənin Azərbaycandakı 5-ci kalonu ilə bağlı yazdığım halda, Azərbaycan Dövlət Neft Şirkəti və “Çağ Öyrətim” gözləyib, eyni anda məni məhkəməyə verirlər. Və Neft Şirkətinin məni məhkəməyə verməsindən sırf təsadüf nəticəsində, Səbael rayon məhkəməsinin internet saytına daxil olaraq, başqa bir məlumat almaq istədiyim zaman xəbər tuturam. Deməli, hazırlıq və baxış keçirildiyi halda mən məlumatlandırılmamışam. Halbuki mənim bütün koordinatlarım saytımızda var və bu ölkədə ən asan tapılacaq adamlardan biriyəm. Belə olduğu halda nə ARDNŞ, nə də məhkəmə mənimlə əlaqə yaratmağa cəhd etmədən, haqqımda qərar çıxarmaq və məni susdurmaq istəyirlər. Eyni zamanda biz “Çağ Öyrətim”in vəkilinə təhqirsiz, normal bir cavab məktubu göndərəcəkləri təqdirdə, dərc edə biləcəyimizi bildirsək də, onlar da mənim həbs olunmağımda və “Yeni Çağ”ın bağlanmasında qərarlıdırlar”.
Aqil Ələsgər bildirdi ki, “mənə bu yazıları dayandırmağım üçün təhdid və təkliflər neçə aydan bəri davam edir. Ancaq mənim mövqeyim belədir ki, Azərbaycanın gəncliyini kökü, mənşəyi bəlli olmayan şəbəkələrin öhdəsinə buraxmaq olmaz. Madam ki, ARDNŞ rəhbərliyi mərhum prezident Heydər Əliyevə sədaqətli olduğunu bəyan edir, o zaman nə üçün Pensilvaniyadakı orta təhsilli lider seçənləri dəstəkləməkdən vaz keçməlidir, onlarla mübarizə aparanı susdurmaq yolunu tutmamalıdır. Bizi məhkəmələrlə susdurmağa çalışanlardan fərqli olaraq, hesab edirik ki, ən böyük məktəb Gülən deyil, Heydər Əliyev məktəbidir və bizim yolumuz budur. Cənab prezident İlham Əliyevin getdiyi yol da bu yoldur. Bizim mübarizəmiz bu yoldan çıxanlarla hər zaman olub və heç bir məhkəmə bizi bu yoldan çəkindirə bilməz”.
Son şərhlər