Xüsusi ittihamla məhkəməyə verilmiş baş redaktor R. Məhəmmədoğlu öz müraciətində bildirir ki, “mənə qarşı irəli sürülən iddialar heç bir reallığa cavab vermir və heç bir sübutlarla təsdiqlənmir. Bu mənim həbs edilməyim üçün bir sifarişdir. Amma mən inanıram ki, Azərbaycanda hələdə ədalətli məhkəmələr var və ədalətli qərar çıxardacaqlar”.
Baş redaktorun İnsan Hüquqları Üzrə Birgə Qrupun nümayəndəsi xanım N.Cəfəroğluna müraciətini olduğu kimi təqdim edirik.
Hörmətli Novella xanım!
Bəri başdan Sizi və Sizin şəxsinizdə Azərbaycanın bütün azad ruhlu, haqqsevər vətəndaşlarını İnsan Hüquqları Üzrə Birgə Qrupun ölkə başçısının iradəsi ilə öz fəaliyyətini bərpa etməsi münasibətilə təbrik edir, uğurlar arzulayıram.
Məlum edirəm ki, SonOlay.orq saytının və OlayTV.az Milli Xəbər Agentliyinin baş redaktoruyam. Jurnalist kimi peşə fəaliyyətimdə həmişə obyektivliyə üstünlük vermiş, qərəzçilikdən uzaq olmuşam. Cəmiyyətdə müşahidə olunan haqsızlıqlara da göz yummamış, bir sözlə, düzü düz, əyrini əyri yazmağa çalışmışam. Elə Füzuli rayon Təhsil Şöbəsinin müdiri Almaz Nəşimovanın rəvac verdiyi qanunsuzluqlara biganə qala bilməməyimin də səbəbi məhz ədalətpərvərliyim olmuşdur.
Hörmətli hüquq müdafiəçisi!
Artıq bir neçə aydır ki, SonOlay.orq Milli Xəbər Agentliyində Almaz Həşimovanın Füzuli rayon təhsil sistemində yol verdiyi əyintilər, qol qoyduğu maliyyə maxinasiyaları və korrupsiya hüquqpozmaları barədə tənqidi məqalələr dərc olunmuşdur. Eyni zamanda, aidiyyəti qurumlara, hüquq-mühafizə orqanlarına tərəfimizdən müraciət edilərək, onların diqqətini bu məsələyə yönəltməyə çalışmışıq.
Bütün bunları həzm edə bilməyən Almaz Həşimova özünün məni məhkəməyə verməyə cəsarəti çatmadığı üçün başqa bir iyrənc üsula əl ataraq məni şərləməyə çalışmışdır. Həm də Yeni Azərbaycan Partiyası Füzuli rayon Təşkilatının sədri olan Almaz Həşimova bu çirkin məqsədinə nail olmaq üçün partiyadaşı Abbasova Zümrüd Abbas qızının xidmətindən istifadə etmişdir. Belə ki, “facebook” sosial şəbəkəsinin istifadəçisi olan Zümrüd Abbas mənim şəbəkədə paylaşdığım məqalələrin altından təhdiq və təhqir dolu “rəylər” yazmışdır. Bununla o, müəllifi hövsələdən çıxarmağa, ağır cavab verməsinə nail olmağ çalışmışdır ki, nəhayətdə məni məhkəməyə verib guya onun şərəf və ləyaqətini alçaldığım üçün ittiham etsin. Doğrudur, mən onun qərəzli rəylərinə münasibət bildirsəm də, sözlərimdə heç bir təhqir elementi olmayıb. Buna baxmayaraq, Z.Abbasova mənə sifarişli məhkəmə qurdurub divan tutmaq istəyən vəzifəli şəxsin öz niyyətini həyata keçirməsinə köməklik etmişdir. Z.Abbasovanın mənə qarşı xüsusi ittiham qaydasında irəli sürdüyü iddiaya görə guya mən sosial şəbəkədə və saytda onun özünü və ailəsini təhqir etmişəm. O, mənim AR Cinayət Məcəlləsinin 147.1.2 və 148-ci maddələri ilə təqsirləndirilərək bu maddələr üzrə nəzərdə tutulmuş ən yüksək cəzanın verilməsini, habelə, məndən 500000 (beş yüz min) manat pul vəsaitinin tutularaq onun nəfinə ödətdirilməsini məhkəmədən xahiş etmişdir. Keçirilmiş məhkəmə hazırlıq iclasında mənə qarşı irəli sürülən ittihamla razılaşmayaraq, bunun sifarişli böhtan olduğunu düşündüyümü bildirmişəm.
Onu da qeyd etməyi özümə borc bilirəm ki, Z.Abbasova ittiham edərkən, məni hakim partiyanın uğurlarını gözü götürməyən müxalifətçi jurnalist adlandırmışdır. Halbuki, mən heç bir müxalifət partiyasının üzvü deyiləm və hesab etmirəm ki, azad sözü demək üçün, haqsızlığa qarşı etiraz səsi ucaltmaq üçün mütləq müxalifətçi olmaq lazımdır. Bu, təxminən ona bənzəyir ki, N.Cəfəroğlunu və İnsan Haqları Üzrə Birgə Qrupun bütün üzvlərini hakimiyyətlə işbirliyində suçlayırlar.
Hörmətli hüquq müdafiəçisi, mən Sizin siyasi dustaqların azad olunması, pozulan insan hüquqlarının bərpası naminə apardığınız işi təqdir edir, alqışlayıram. Elə bilirəm ki, mənə qarşı açılan bu böhtan və şər kampaniyasına da biganə qalmayacaqsınız. Ümid edirəm ki, problemlə bağlı lazım gəlsə hökumət qarşısında məsələ qaldıracaq, gərək olsa, Avropa Məhkəməsi müstəvisinə çıxaracaqsınız. Çünki bu hadisə birbaşa söz azadlığına qarşı qəsddir.
Sizə inanıram, ona görə ki, “bu gün bizim bütün bəlalarımız məhkəmə sistemindən gəlir” demisiniz. Elə isə yol verməyin sifarişli məhkəmə məni bəlaya salsın. Onu da bilirəm ki, Dilarə Əliyeva adına Qadın Hüquqlarının Müdafiəsi Cəmiyyətinin rəhbərisiniz. Ancaq əminəm ki, insan və vətəndaş hüquqlarına hörmətsiz yanaşan həmcinslərinizlə həmfikir olmazsınız. Odur ki, köməklik göstərməyinizi xahiş edirəm. Tərəfimdən lazım olan digər təfərrüatları, müdafiəmə kömək edəcək materialları təqdim etməyə hazıram.
Qabaqcadan minnətdarlığımı bildirirəm.
Son şərhlər