XVIII “Vsya Rossiya-2014” festivalı çərçivəsində “Bakı 2015” ilk Avropa Oyunlarının təqdimatı olub.
Trend xəbər verir ki, Rusiya Jurnalistlər İttifaqının təşkilatçılığı ilə təşkil olunan festival Soçi şəhərində keçirilir.
Rusiya Jurnalistlər İttifaqının katibi Rafael Hüseynov görüşü giriş sözü açaraq 2015-ci ildə Bakıda keçiriləcək I Avropa Oyunlarının uğur qazanacağına əminliyini bildirib.
Rusiya Jurnalistlər İttifaqının sədri Vsevolod Boqdanov dahi Heydər Əliyev haqqında təəssüratlarını bölüşüb və Avropa Oyunlarının Təşkilat Komitəsinə uğurlar arzulayıb.
Rusiyanın tanınmış jurnalisti, “İtoqi” jurnalının siyasi icmalçısı Kirill Privalov deyib: “Bu yaxınlarda Bakıda idim və bu şəhərin gözəllik və gücünə heyran oldum”.
Festivalın qonaqları – Bolqarıstan Jurnalistlər İttifaqının baş katibi Snejana Todorova, diplomat Aleksandr Losyukov, “Telefilm” kino şirkətinin baş direktoru Yuri Matsyuk və digərləri Bakı və bakılılar haqqında danışıblar və qeyd ediblər ki, müxtəlif xalq və dinlərin nümayəndələri Azərbaycanda dostluq və qarşılıqlı etimad mühitində yaşayırlar.
“Bakı 2015” Avropa Oyunlarının Əməliyyat Komitəsinin korporativ direktoru Elçin Səfərov bildirib ki, “Bakı Avropa Oyunları 2015”-in təqdimatı artıq Fransa, Yunanıstan və digər ölkələrdə olub. Ötən dövr ərzində görülmüş işlər, tikilən idman obyektləri, Avropa Oyunlarının Təşkilat Komitəsinin sədri, Heydər Əliyev Fondunun prezidenti Mehriban Əliyevanın rəhbərliyi altında keçirilmiş iclaslar, həmçinin Azərbaycanın idmanda qazandığı uğurları haqqında festival iştirakçıların ətraflı məlumat verilib.
E.Səfərov qeyd edib ki, I Avropa Oyunları gələn il iyunun 12-28-də keçiriləcək: “Ümulilikdə 2015-ci ildə Bakıda 20 idman yarışı təşkil olunacaq. Avropanın hər yerindən olan altı mindən çox idman öz ölkələrini təmsil edəcəklər”.
Trend informasiya agentliyinin baş direktorunun müavini Arzu Nağıyev, “Sport” qəzetinin baş redaktoru Qabil Mehdiyev, “Novosti-Azərbaycan” agentliyinin baş direktoru Gülnarə Məmmədzadə, “Bakinskiy raboçiy” qəzetinin nümayəndəsi İlqar İsmayılov, Oyunların Əməliyyat Komitəsinin sədri Pirim Pirimov, Ali Attestasiya Komissiyasının Krasnodar vilayəti üzrə regional şöbəsinin müdiri Cəmil Əliyev və digərləri çıxışlarında vurğulayıblar ki, Avropa Oyunları idman tarixində yeni səhifə açır. Onlar əmin olduqlarını bildiriblər ki, ilk yarışlar ədalət, sağlaq rəqabət, dostluq və həmrəylik şəraitində keçəcək.
Tədbirdə Bakı haqqında videofilm nümayiş etdirilib. Görüşün bütün iştirakçılarına “Bakı-2015” Təşkilat Komitəsi adından xatirə hədiyyələri təqdim olunub.
Qeyd edək ki, “Vsya Rossiya” jurnalistlər festivalı nüfuzlu KİV əməkdaşları, həmçinin beynəlxalq təşkilatların nümayəndələrinin bir araya gəldiyi peşəkar diskussiya məkanıdır.
Son şərhlər