Azərbaycan “Vaşinqton Tayms”da

“Vaşinqton Tayms” qəzetinin redaktoru Con Solomonun moderatorluq etdiyi bu tədbirdə müvafiq ardıcıllıqla Azərbaycanın ABŞ-dakı səfiri Elin Süleymanov, Azərbaycan Milli Məclisinin Beynəlxalq münasibətlər və parlamentlərarası əlaqələr komitəsinin sədri Səməd Seyidov və onun deputat həmkarı, Demokratik İslahatlar Partiyasının (DİP) sədri Asim Mollazadə məruzə ilə çıxış edib. DİP-dən veriən məlumata görə, A.Mollazadə ABŞ-Azərbaycan münasibətlərinin möhkəm əsaslar üzərində dayandığını qeyd edərək, ölkələr arasında təhlükəsizlik sahəsində aparılan əməkdaşlıqdan söz açıb. O, Azərbaycan hərbiçilərinin müxtəlif vaxtlarda beynəlxalq koalisiyaların tərkibində Balkanlar, İraq və Əfqanıstanda xidmət etdiklərini və bu gün belə Azərbaycan əsgərlərinin Əfqanıstanda Kabul aeroportunu qoruduqlarını bildirib. Azərbaycanın həmçinin Əfqanıstanın dirçəlməsinə yönəlmiş fəaliyyətlərə verdiyi töhfəni qeyd edən millət vəkili Əfqanıstandakı beynəlmiləl qüvvələr üçün hava daşımalarında Azərbaycanın rolunu da vurğulayıb. A.Mollazadə qeyd edib ki, terrorizmi yalnız güc hesabına məğlub etmək mümkün deyil və bu sahədə maarifləndirmə işlərinin aparılması böyük önəm daşıyır.

Deputat Azərbaycanda müxtəlif dinlərin təmsilçiləri arasında münasibətlərin qarşılıqlı hörmətə əsaslandığını da diqqətə çatdırıb. Bu mənada Azərbaycanın nümunəvi bir model təşkil etdiyini deyib. A.Mollazadə Avrasiya regionunda cərəyan edən hadisələrlə bağlı da öz fikirlərini bölüşüb. Azərbaycan-İsrail münasibətlərinin inkişafından söz açıb, Bakı-Tbilisi-Qars dəmir yolu daxil olmaqla, regional nəqliyyat şəbəkəsinin təsis edilməsi üçün aparılan fəaliyyətləri təqdim edib.

Milli Məclisin Beynəlxalq əlaqələr komitəsinin rəhbəri Səməd Seyidov isə çıxışında Amerikanın hazırda regionda çox az dosta sahib olduğunu bildirib:   “Biz məhz buna görə istəyirik ki, regiona daha çox diqqət ayrılsın. ABŞ Avrasiyaya münasibətdə dəqiq və uzunmüddətli geosiyasi strategiya müəyyənləşdirməlidir. Əks halda, Vaşinqton regionu itirə bilər. Cənub Qaz Dəhlizi təkcə neft və qaz koridoru deyil, bu həm də azadlıq koridorudur”. (axar.az) Tədbirin sonunda azərbaycanlı natiqlər moderator və iştirakçıların suallarını cavablandırıb.

ATƏT-in Minsk Qrupunun amerikalı həmsədri Ceyms Uorlik Azərbaycan Milli Məclisinin ABŞ-da səfərdə olan deputatları Səməd Seyidov və Asim Mollazadə ilə görüşüb. “Azərbaycanın millət vəkilləri Səməd Seyidov və Asim Mollazadə ilə görüşməkdən məmnunam. Onlarla Dağlıq Qarabağ münaqişəsinin nizamlanmasının perspektivləri ilə bağlı danışıqlarımız çox faydalı oldu”, Ceyms Uorlik twitter hesabında yazıb. Xatırladaq ki, Ceyms Uorlik yaxın zamanda Minsk Qrupunun həmsədrlərinin regiona səfər edəcəyini bildirib.

Onu da qeyd edək ki, ABŞ-Azərbaycan münasibətlərində son günlər istiləşmə müşahidə olunur. Amerika mətbuatının Azərbaycanla bağlı müsbət xarakterli yazıları da intensiv çap olunur. Yaxın günlərdə isə ABŞ-ın yeni səfiri Bakıda fəaliyyətə başlayacaq.