Azərbaycan Respublikasının xarici işlər naziri Ceyhun Bayramov ölkəmizdə səfərdə olan Moldova Respublikasının Baş nazirinin müavini, xarici işlər naziri Mihay Popşoy ilə görüşüb.
Bu barədə Elchi.az-a XİN-in Mətbuat xidmətindən məlumat verilib.
Nazir Ceyhun Bayramov və nazir Mihail Popşoy arasında baş tutan təkbətək görüş, daha sonra hər iki tərəfin nümayəndə heyətlərinin iştirakı ilə geniş tərkibdə davam etdirilib.
Görüşlər zamanı Azərbaycan ilə Moldova arasında strateji tərəfdaşlıq əlaqələrinin dinamikası müzakirə olunub, ikitərəfli siyasi dialoqun davam etdirilməsinin əhəmiyyəti vurğulanıb, iqtisadi, enerji, alternativ enerji, nəqliyyat və humanitar sahələrdə əməkdaşlığın genişləndirilməsi imkanları nəzərdən keçirilib.
Qarşılıqlı investisiyaların təşviqi, biznes dairələri arasında əlaqələrin gücləndirilməsi və regional nəqliyyat-logistika imkanlarından daha səmərəli istifadə edilməsinin vacibliyi qeyd edilib. Bu çərçivədə, Moldova tərəfi ölkəmizdə olan azad iqtisadi zonaların yaratdığı imkanlardan faydalanmağa çağırılıb.
Humanitar sahədə, o cümlədən mədəniyyət, elm və təhsil istiqamətləri üzrə əməkdaşlığın davam etdirilməsinin, tələbə mübadiləsinin əhəmiyyəti vurğulanıb. Heydər Əliyev Fondu tərəfindən Qaqauziyada həyata keçirilən layihələr məmnunluqla diqqətə çatdırılıb. Bununla yanaşı, birbaşa təyyarə reyslərinin mövcudluğu, xalqlar arasında artan əlaqələr, turizm sektoruna müsbət təsir edən amillər sırasında qeyd edilib.
Beynəlxalq və regional təşkilatlar çərçivəsində əməkdaşlıq məsələləri müzakirə edilib, BMT, ATƏT, Avropa Siyasi Birliyi, QDİƏT və digər çoxtərəfli platformalarda bir-birinin legitim maraqlarına hörmət və qarşılıqlı dəstəyə əsaslanan birgə fəaliyyətlərdən məmnunluq ifadə olunub.
Görüşdə həmçinin, regional təhlükəsizlik məsələlərinə, Rusiya-Ukrayna müharibəsinə və Yaxın Şərqdə vəziyyətə toxunulub.
Yaxın Şərqdə artan hərbi eskalasiyanın ciddi narahatlıq doğurduğu vurğulanıb. 5 mart 2026-cı il tarixində İran tərəfindən Azərbaycanın Naxçıvan Muxtar Respublikası istiqamətində dronlar vasitəsilə həyata keçirilmiş və mülki obyektlərin o cümlədən hava limanı terminalının, məktəb binasının zədələnməsi və mülki şəxslərin xəsarət alması ilə nəticələnən hücumların qəbuledilməz olduğu bir daha diqqətə çatdırılıb.
Nazir Ceyhun Bayramov həmkarına Azərbaycan ilə Ermənistan arasında münasibətlərin normallaşdırılması prosesi, eləcə də azad edilmiş ərazilərimizdə aparılan bərpa-quruculuq fəaliyyətləri və keçmiş məcburi köçkünlərin qayıdışı barədə məlumat verib.
Səfər çərçivəsində, nazirlər tərəfindən Azərbaycan Respublikasının Xarici İşlər Nazirliyi ilə Moldova Respublikasının Xarici İşlər Nazirliyi arasında 2026-2027-ci illər üzrə məsləhətləşmələr Planı imzalanıb.
Görüşlərdən sonra birgə mətbuat konfransı təşkil edilib, nazirlər görüşlərin nəticələrinə dair bəyanatlarla çıxış edib və jurnalistlərin suallarını cavablandırıblar.
***
12:30
Azərbaycan xarici işlər naziri Ceyhun Bayramov və Moldova Respublikasının Baş nazirinin müavini, xarici işlər naziri Mixay Popşoi arasında geniş tərkibli görüş keçirilib.
Bu barədə XİN-in “X” hesabında paylaşım edilib.
Nazirlər Yaxın Şərqdə qeyri-sabit vəziyyətə toxunublar.
Ceyhun Bayramov 5 mart 2026-cı il tarixində İranın Naxçıvan Muxtar Respublikasına qarşı həyata keçirdiyi dron hücumlarının hava limanı və məktəb də daxil olmaqla, mülki infrastruktura ziyan vurması və mülki şəxslərin yaralanması ilə bağlı ciddi narahatlığını ifadə edib.
Həmçinin Ceyhun Bayramov moldovalı həmkarına Azərbaycan və Ermənistan arasında münasibətlərin normallaşması istiqamətində davam edən proses barədə də məlumat verib.
***
12:15
Azərbaycan xarici işlər naziri Ceyhun Bayramov və Moldova Respublikasının Baş nazirinin müavini, xarici işlər naziri Mixay Popşoi arasında təkbətək görüş keçirilir.
Bu barədə XİN-in “X” hesabında paylaşım edilib.
***
12:00
Azərbaycan xarici işlər naziri Ceyhun Bayramov Moldova Respublikası Baş nazirinin müavini, xarici işlər naziri Mixay Popşoini qarşılayıb.
Bu barədə XİN-in “X” hesabında paylaşım edilib.
