Nüfuzlu agentlik investisiya qoyuluşu üçün əlverişli ölkələrin siyahısını açıqlayıb
“Blomberg” agentliyi investisiya qoyuluşu üçün əlverişli ölkələrin siyahısını açıqlayıb. Rusiya, İndoneziya, CAR, Hindistan kimi ölkələrin yer aldığı siyahıya Azərbaycan düşməyib. Ölkədə isə iki ilə yaxındır ki, investisiya cəlb edilməsi üçün müxtəlif tədbirlər görülür. Azərbaycanın investisiya üçün cəlbediciliyinin olmamasının səbəblərini ekspertlər musavat.com-a açıqlayıblar.
Ekspert Natiq Cəfərli məsələ ilə bağlı musavat.com-a bildirib ki, “Blomberg”in siyahısına düşə bilməməsinin səbəbləri müxtəlifdir: “Əsas səbəblər ölkənin xronoloji xəstəlikləridir. Uzun zamandır Azərbaycanda inhisarçılıq və korrupsiya o qədər yüksək səviyyədə olub ki, bu, investorları çəkindirən əsas faktora çevrilib. Son zamanlar isə yeni faktorlar əlavə olunub. Ölkədə alıcılıq qabiliyyəti aşağı düşdükcə, əhalinin gəlirləri azaldıqca, investisiya üçün cəlbedicilik itir. İkinci problem iqtisadi məsələdən çox hüquqi məsələdir. Azərbaycanda müstəqil fəaliyyət göstərən məhkəmələr olmadıqca və mülkiyyət hüququnun toxunulmazlığı təmin edilmədikcə, ölkə investorları çox ciddi şəkildə çəkindirəcək. Son zamanlar hətta sərbəst şəkildə valyutaya çıxış imkanlarının məhdudlaşdırılması, valyuta alış-satışlarının çətinləşdirilməsi investorları ən çox çəkindirən məsələlərdən biridir. Ölkədə sərbəst şəkildə valyutanın daxil olmasına və çıxışına maneələr yaradılırsa və valyuta alış və satışı çətinləşdirilirsə, bu, bir siqnaldır. Son aylar baş verən proseslər investorları ölkədən daha da çəkindirir. Bu tipli reytinqlərdə Azərbaycanın yer almamasına və investisiya, yatırım üçün cəlbedici ölkə olmamasına səbəb olur”.
Qubad İbadoğlu isə bildirib ki, Azərbaycan investisiya cəlbediciliyini bir neçə səbəbdən itirib: “Ölkənin korrupsiya, şəffaflıq, hesabatlıq göstəriciləri aşağıdır. Mədən Sənayesində Şəffaflıq Təşəbbüsü Koalisiyasının Azərbaycanın Açıq Hökumət Tərəfdaşlığında statusunun endirilməsi də buna təsir göstərib. Beynəlxalq reytinqlər, o cümlədən beynəlxalq kredit agentlikləri qiymətləndirmə aparırlar, bu da son nəticəyə təsir göstərir. Bu, həm də ölkədəki mövcud iqtisadi durumla bağlıdır. Ölkədə idarəetmədə inzibati metodlardan istifadə olunması, oliqarx idarəçilik üsulunun davam etməsi də reytinqin pisləşməsini şərtləndirir. Hesab edirəm ki, ölkədə bazar institutlarının fəaliyyət göstərməməsi, qiymətlərin sərbəstləşdirilməməsi, Tarif Şurasının fəaliyyət göstərməsi də təsir göstərən amillərdən biridir. Eyni zamanda mövcud iqtisadi durum, manatın tarazlığının formalaşmaması, devalvasiya ehtimalları barədə xəbərlər cəlbedicilik səviyyəsinin aşağı düşməsinə və pisləşməsinə gətirib çıxarır. Bu baxımdan, ”Blomberg”in siyahısında Azərbaycanın adına rast gəlmək mümkün deyil. Problemlər həll olunmasa, Azərbaycan investisiya cəlbediciliyi olan ölkələrin siyahısına düşə bilməyəcək”.
Son şərhlər