İsveçrənin Cenevrə şəhərində Beynəlxalq Telekommunikasiya İttifaqı (BTİ) Şurasının iclası keçirilir.
Bu barədə Elchi.az-a Rəqəmsal İnkişaf və Nəqliyyat Nazirliyindən (RİNN) bildirilib.
Tədbirdə Azərbaycan rəqəmsal inkişaf və nəqliyyat nazirinin müavini Saməddin Əsədovun rəhbərlik etdiyi nümayəndə heyəti ilə təmsil olunur.
Şuranın iclasında Bakıda keçirilmiş Ümumdünya Telekommunikasiyanın İnkişafı Konfransının (WTDC-25) hesabatı, bu il təşkil olunacaq BTİ-nin Səlahiyyətli Konfransına, həmçinin 2027-ci ildə nəzərdə tutulan Ümumdünya Radiorabitə Konfransına və Radiorabitə Assambleyasına hazırlıq müzakirə edilib. 2028 – 2031-ci illər üzrə Strateji və Maliyyə Planı və digər məsələlər də diqqət mərkəzində olub.
Azərbaycanın BTİ Şurasına 2027 – 2030-cu illər üzrə, eyni zamanda Azərkosmosun nümayəndəsinin Radio Tənzimləmə Komitəsinə üzvlük üçün namizədliyi təqdim olunub.
Şuranın iclası çərçivəsində nazir müavini Saməddin Əsədov BTİ-nin baş katibi Dorin Boqdan Martin ilə görüşüb. Görüşdə Azərbaycanda rəqəmsal inkişaf istiqamətində həyata keçirilən tədbirlər barədə məlumat verilib, mövcud əməkdaşlığın genişləndirilməsi imkanları müzakirə olunub.
Nazir müavini Türkiyənin nəqliyyat və infrastruktur nazirinin müavini Ömər Fatih Sayan, Qazaxıstanın süni intellekt və rəqəmsal inkişaf nazirinin müavini Dosjan Musaliyev və Çinin sənaye və informasiya texnologiyaları nazirinin müavini Xiong Jijun ilə də ikitərəfli görüşlər keçirib.
Bu görüşlər Azərbaycanın rəqəmsal inkişaf sahəsində mövqeyinin beynəlxalq səviyyədə təqdim olunması, süni intellekt və innovasiya sahələrində təcrübə mübadiləsinin genişləndirilməsi, eləcə də yeni ikitərəfli və çoxtərəfli əməkdaşlıq imkanlarının formalaşdırılması baxımından əhəmiyyətli olub.
Qeyd edək ki, BTİ Şurasının iclasından əvvəl nazirlərin qeyri-rəsmi görüşü keçirilib. Üzv dövlətlərin yeni texnologiyalardan istifadə imkanları, özəl sektorun iştirakının artırılması, maliyyələşmə modelinin təkmilləşdirilməsi, BMT ilə əməkdaşlığın yenilənməsi və digər məsələlər müzakirə edilib.
