Bəstəkar-ifaçı Aydan Əliyevanın Oğuz rayonunda möhtəşəm solo konserti keçirilib. Konsert Oğuz rayonunun ən böyük parkı olan Zərifə Əliyeva adına İstirahət Parkında baş tutub. Tədbirə qatılan tamaşaçılar zəngin musiqi proqramından böyük zövq alıblar.
Konsertin təşkilati dəstəyi Oğuz Rayon İcra Hakimiyyəti və Oğuz Mədəniyyət Sarayının metodisti Anar Hüseynov tərəfindən həyata keçirilib.
Aydan Əliyeva gecə ərzində repertuarında yer alan Cahangir Cahangirov və digər tanınmış bəstəkarların əsərlərini, öz bəstələrini, eləcə də milli muğam nümunələrini səsləndirib. Bəstəkar-ifaçını Oğuzun peşəkar musiqiçilərindən ibarət “Şur” İnstrumental Musiqi Ansamblı müşayiət edib.
Konsertin maraqlı məqamlarından biri Aydan Əliyevanın gənc və istedadlı müğənni Elmira Rəhimova ilə duet ifası olub. Onlar sözləri böyük şairə Kəmalə Abıyevaya, musiqisi Aydan Əliyevaya məxsus olan “O yağışdan yağmayacaq” mahnısını birlikdə ifa ediblər.
Daha sonra Aydan Əliyeva istedadlı Oğuz müğənnisi Ülvi Salahovla birlikdə Elxan Şirinovun repertuarından olan “Başqa birisini sevə bilməzsən” mahnısını səsləndirib. Sözləri Nüsrət Kəsəmənliyə, musiqisi Cabbar Musayevə məxsus olan mahnı tamaşaçılar tərəfindən böyük maraqla qarşılanıb.
Konsert “Gözəl Azərbaycan” mahnısı ilə yekunlaşıb.
Gənc yaşına baxmayaraq istedadlı və peşəkar bəstəkar-ifaçı kimi özünəməxsus yaradıcılıq yolu ilə seçilir. Onun bir sıra musiqi əsərləri və mahnıları Azərbaycanın tanınmış müğənnilərinin repertuarında yer alır.
Qeyd edək ki, Aydan Əliyeva Azərbaycan Bəstəkarlar İttifaqının üzvü və beynəlxalq müsabiqələr laureatıdır. 
