“Avropa vətəndaşlarının dörddə üçü Ukraynanın Avropa Birliyinə tələsik qoşulmasının əleyhinədir, Macarıstanda isə vətəndaşların 95%-i bu fikri bölüşür”.
Elchi.az xəbər verir ki, bunu baş nazir Viktor Orban Macarıstanın Szazadveg (Əsrin sonu) politologiya institutunun Aİ ölkələrində keçirdiyi sorğunun nəticələrini şərh edərkən deyib.
“Avropalıların dörddə üçü Ukraynanın Avropa Birliyinə sürətləndirilmiş üzvlüyünü rədd edir. Bununla belə, Brüsseldəki Aİ liderləri irəliləməyə davam edir. Onlar xalqın nə düşündüyünə əhəmiyyət vermirlər və hələlik yalnız bir neçə Avropa hökuməti Brüsselin iradəsinə müqavimət göstərmək gücünə malikdir. Macarıstan istisnalardan biridir”,-deyə Orban bildirib.
O, qeyd edib ki, “Szazadveg”in bu yaxınlarda keçirdiyi sorğuya əsasən, macarların 95%-i öz fermerlərini, ailələrinin təhlükəsizliyini və Macarıstanda sülhü qorumaq istədikləri üçün Ukraynanın Aİ-yə sürətlə daxil olmasını rədd edib.
Orban vurğulayıb ki, onun hökuməti öz vətəndaşlarının fikirlərini rəhbər tutmaq niyyətindədir və Ukraynanın Aİ-yə daxil olmasına imkan verməyəcək.
“Təzyiqlərə baxmayaraq, yerindən tərpənməyəcəyik”,-deyə baş nazir yekunlaşdırıb.
Yeganə
